اسلام آباد( پاکستان پوائنٹ نیوز14۔جولائی۔2018ء ) احتساب عدالت ولوں سزا یافتہ سابق وزیر اعظم نواز شریف تے اوہناں دی دھی مریم نواز دی اپیل تیار کر لی گئی اے۔ احتساب عدالت نے ایون فیلڈ ریفرنس وچ نواز شریف نوں 10، مریم نواز نوں 7تے کیپٹن (ر) صفدر نوں اک سال قید دی سزا سُنائی اے۔ وسیلیاں مطابق نواز شریف تے مریم نواز دی احتساب عدالت دے فیصلے خلاف اپیل تیار ہو گئی اے۔
مریم نواز دے وکیل کُجھ دیر وچ اڈیالا جیل جان گے تے اوہناں توں وکالت نامے اُتے دستخط کروائے جان گے۔ مریم نواز تے کیپٹن (ر) صفدر دی اپیل اج ای دائر کیتے جان دی آس اے۔ عدالتوں اپیل دا فیصلا آن تیکر کیپٹن (ر) صفدر دی اک سال دی سزا معطل کرن دی بیتنی کیتی جائے گی۔ نواز شریف دی اپیل اج یاں پیر نوں دائر کیتے جان دے حوالے نال وکیلاں نال صلاح جاری اے۔
چیتے رہوے کہ احتساب عدالت ولوں ایون فیلڈ ریفرنس وچ سزا پان والے مسلم لیگ (ن) دے قائد میاں نواز شریف تے اوہناں دی دھی مریم نواز نوں پچھلے دیہاڑے جیل منتقل کر دتا گیا۔ نواز شریف نوں اڈیالا جیل دے ہائی سکیورٹی زون وچ رکھیا گیا اے، جتھے اوہناں نے پہلی رات قید وچ لنگھائی۔ جیل وسیلیاں مطابق مریم نواز نے اڈیالا جیل دی خواتین بیرکس وچ رات لنگھائی۔ نواز شریف تے مریم نواز نے سویرے فجر دی نماز پڑھی، بعدوں دوواں نوں ناشتہ دتا گیا۔ جیل مینوئل مطابق میاں نواز شریف نوں آنڈے پراٹھے تے چاہ دی آفر کیتی گئی پر اوہناں نے صرف چاہ پیتی تے نال کُجھ دوائیاں وی کھادیاں، مریم نواز نے وی ڈھڈ بھر کے ناشتہ نہیں کیتا۔
