لاہور( پاکستان پوائنٹ نیوز13۔جولائی۔2018ء ) نواز شریف تے مریم نواز نوں گرفتار کر لیا گیا۔ تفصیل مطابق مسلم لیگ (ن) دے قائد نواز شریف تے مریم نواز لندن وچ سن۔لندن توں براستہ دبئی لاہور اپڑدے ای مریم نواز تے نواز شریف نوں نیب ٹیم نے گرفتار کر لیا اے۔چیتے رہوے کہ پچھلے جمعے احتساب عدالت ولوں ایون فیلڈ ریفرنس کیس دا فیصلا سُنایا گیا ۔ فیصلے دے تحت سابق وزیر اعظم نواز شریف نوں 10، اوہناں دی دھی مریم نواز نوں 7تے داماد کیپٹن (ر) صفدر نوں اک سال قید دی سزا سُنائی گئی سی۔
نواز شریف نوں 10ملین پاؤنڈ تے مریم نواز نوں 2ملین پاؤنڈ جرمانہ وی کیتا گیا اے۔جیہدے مگروں اج نواز شریف لاہور اپڑے۔دوجے پاسے نواز شریف تے مریم نواز دا لاہور ائر پورٹ اُتے استقبال کرن لئی پنجاب بھر توں (ن) لیگی رہنماواں دی قیات وچ لیگی کارکن ائر پورٹ اپڑن دی کوشش کر رہے نیں۔ مسلم لیگ (ن) دے صدر شہباز شریف تے ہور سینئر رہنما وی اپنیاں اپنیاں ریلیاں دی قیادت کر رہے نیں۔
سکیورٹی خدشیاں نوں مُکھ رکھدے ہوئے لاہور دیاں کئی وڈیاں سڑکاں اُتے کنٹینرز لائے گئے جدکہ لاہور توں اسلام آباد موٹروے تے جی ٹی روڈ نوں وی ٹریفک لئی بند کر دتا گیا سی ۔ راوی پُل اُتے رکاوٹاں پار کرن دے معاملے اُتے مسلم لیگ (ن) دے کارکناں تے پولیس اہلکاراں وچ تلخی ہوئی، جیہدے مگروں دوویں پاسیوں اک دوجے نوں وٹے مارے گئے۔
