لاہور( پاکستان پوائنٹ نیوز13۔جولائی۔2018ء ) آئی جی پنجاب پولیس کلیم امام نے (ن) لیگی کارکناں دی رہائی دا حکم دے دتا اے، قانونی تقاضے پورے کردے ہوئے گرفتار کارکناں نوں رہا کر دتا جائے، (ن) لیگی کارکناں دی رہائی دا عمل شروع کر دتا گیا۔ میڈیا رپورٹ مطابق احتساب عدالتوں ایون فیلڈ ریفرنس وچ سزا یافتہ سابق وزیر اعظم نواز شریف دے استقبال لئی لاہور ائر پورٹ جان والے سینکڑیاں کارکناں نوں پولیس نے پچھلے دیہاڑے ای گرفتار کر لیا سی۔
پر ہن آئی جی پنجاب پولیس کلیم امام نے حکم دتا کہ سارے (ن) لیگی کارکناں نوں رہا کیتا جائے۔دوجے پاسے ملک بھر توں لیگی کارکناں دے قافلے نواز شریف دے استقبال لئی لاہور اپڑ رہے نیں، جتھے اوہناں نوں نگران حکومت ولوں مزاحمت دا ساہمنا اے۔ ایس حوالے نال گل بات کرد ے ہوئے رانا ثناء اللہ دا کہنا سی کہ کارکن ملک بھر توں استقبال لئی آ رہے نیں۔ نگران حکومت نے ریلی نوں نہ روکن دا وعدہ کیتا سی تے ہن اوہ اپنے وعدے توں مُکر گئے۔
اوہناں دا کہنا سی کہ کارکناں نوں روکن لئی کنٹینر لائے گئے پر کارکن پیدل ٹُر پئے نیں۔ایس توں پہلاں راوی پُل اُتے رکاوٹاں پار کرن دے معاملے اُتے مسلم لیگ (ن) دے کارکناں تے پولیس اہلکاراں وچ تلخی ہوئی، جیہدے مگروں دوویں پاسیوں اک دوجے نوں وٹے مارے گئے۔ کارکناں تے پولیس وچکار جھیڑے مگروں حالات خراب ہون دا ڈر اے۔جدکہ کنٹینرز ہٹان لئی مسلم لیگ (ن) دے کارکناں نے کریناں دی مدد لے لی اے۔ کرین دی مدد نال سڑکاں اُتوں کنٹینرز ہٹائے جا رہے نیں۔ مسلم لیگ (ن) دے صدر شہباز شریف وی اپنی ریلی دی قیادت کردے ہوئے ائر پورٹ ول ودھ رہے نیں۔
