لاہور( پاکستان پوائنٹ نیوز13۔جولائی۔2018ء ) مسلم لیگ (ن) دے قائد نواز شریف تے مریم نواز دی پاکستان آمد وچ کُجھ ای چِررہ گیا اے۔ نواز شریف تے مریم نواز دا لاہور ائر پورٹ اُتے استقبال کرن لئی پنجاب بھر توں (ن) لیگی رہنماواں دی قیات وچ لیگی کارکن ائر پورٹ اپڑن دی کوشش کر رہے نیں۔ مسلم لیگ (ن) دے صدر شہباز شریف تے ہور سینئر رہنما وی اپنیاں اپنیاں ریلیاں دی قیادت کر رہے نیں۔
سکیورٹی خدشیاں نوں مُکھ رکھدے ہوئے لاہور دیاں کئی وڈیاں سڑکاں اُتے کنٹینرز لا دتے گئے نیں جدکہ لاہور توں اسلام آباد موٹروے تے جی ٹی روڈ نوں وی ٹریفک لئی بند کر دتا گیا اے۔ راوی پُل اُتے رکاوٹاں پار کرن دے معاملے اُتے مسلم لیگ (ن) دے کارکناں تے پولیس اہلکاراں وچ تلخی ہوئی، جیہدے مگروں دوویں پاسیوں اک دوجے نوں وٹے مارے گئے۔ کارکناں تے پولیس وچکار جھیڑے مگروں حالات خراب ہون دا ڈر اے۔ دوجے پاسے لاہور دیاں کئی سڑکاں اُتے لائے گئے کنٹینرز ہٹان لئی مسلم لیگ (ن) دے کارکناں نے کریناں دی مدد لے لی اے۔ کرین دی مدد نال سڑکاں اُتوں کنٹینرز ہٹائے جا رہے نیں۔ مسلم لیگ (ن) دے صدر شہباز شریف وی اپنی ریلی دی قیادت کردے ہوئے ائر پورٹ ول ودھ رہے نیں۔
