لندن( پاکستان پوائنٹ نیوز13۔جولائی۔2018ء ) برطانوی پولیس نے مریم نواز دے پُتر جنید صفدر نوں رہا کر دتا۔ میڈیا رپورٹ مطابق برطانوی پولیس نے جنید صفدر تے زکریا حسین نواز نوں رہاکردتا اے۔ برطانوی پولیس نے دسیا کہ دوواں کولوں پُچھ پرتیت کیتی گئی، جیہدے مگروں اوہناں نوں چھڈ دتا گیا۔ پر سوشل میڈیا اُتے چلن والیاں خبراں مطابق جنید صفدر دی رہائی پچھے کوئی ہور وجہ نکلی اے۔
دسیا جا رہیا اے کہ جدوں جنید صفدر تے پاکستان تحریک انصاف دے سپورٹر وچکار لڑائی ہو رہی سی تے برطانوی پولیس دے اپڑن اُتے پی ٹی آئی دے سپورٹر نے اپنا سِر مونہ ڈھک لیا۔ جیہدے اُتے جنید صفدر نے آکھیا کہ ’مرد بنو مرد‘ تے جنید صفدر نوں رہا کروان پچھے وی ممکنہ وجہ ایہو ہو سکدی اے ۔ کیونکہ پی ٹی آئی سپورٹر اپنا ناں ظاہر نہیں کرنا چاہندا سی ایس لئی جنید صفدر نوں رہا کر دتا گیا۔
چیتے رہوے کہ پچھلے دیہاڑے سابق وزیر اعظم نواز شریف دی دھی مریم نواز دے پُتر جنید تے حسین نواز دے پُتر نوں مُکا مارن دے الزام وچ گرفتار کر لیا گیا سی۔ سابق وزیر اعظم دے پوترے تے دھوترے نوں ایون فیلڈ فلیٹس باہر وکھالا کرن والیاں نال جھیڑے دے الزام وچ گرفتار کیتا گیا سی۔ تے ایہ سبھ اودوں ہویا جدوں دوویں کزن واپس گھر جا رہے سن۔
