کراچی( پاکستان پوائنٹ نیوز12۔جولائی۔2018ء ) نجی ٹی وی چینل اُتے انٹرویو دوران اینکر نے سابق صدر آصف علی زرداری کولوں سوال کیتا کہ کیہ تُسیں بے نظیر بھٹو نوں یاد کردے او؟جیہدے اُتے آصف علی زرداری نے آکھیا کہ میں 24گھنٹے اوہناں نوں یاد کرنا واں، میرا اپنا طریقہ اے، اسیں اک دوجے نال گل بات وی کردے آں۔ اینکر نے سوال کیتا کہ لوک تہانوں چور، ڈاکو تے بی بی دا قاتل آکھدے نیں، تہانوں ایہ سبھ سُن کے کِداں دا لگدا اے؟جیہدے اُتے آصف علی زرداری نے جواب دتا کہ میرے مُونہ اُتے کسے نے ایہ پہلی وار آکھیا اے۔
آصف زراری نے آکھیا کہ کسے وی منفی گل نوں بُہتا دل اُتے نہیں لینا چاہیدا۔ جو لوک انج آکھدے نیں اوہ خدا نہیں نیں۔ رب اوہناں نوں معاف کرے ۔ جو لوک میرے بارے انج آکھدے نیں اوہناں نے ہر شے کر کے ویکھ لی اے۔ کسے شے وچ اوہناں دا وس نہیں چلدا ہن ایہ وی ویکھ لین کیونکہ اسیں تے بنے ای اوس دن لئی آں۔ ایسے انٹرویو دوران سابق صدر آصف علی زرداری نے آکھیا کہ میں ایہ کدی نہیں آکھیا کہ حکومت بنا سکنا واں یاں میں کنگ میکر آں، میں ہمیشہ پیپلز پارٹی دی ای گل کیتی تے میں ہن وی ایہو آکھ رہیا واں کہ جیہنے وی الیکشن مگروں حکومت بنانی اے اوہنوں پیپلز پارٹی نال گل کرنی پئے گی۔
الیکشن بائیکاٹ بارے سوال دے جواب وچ پیپلز پارٹی دے شریک چیئرمین دا کہنا سی کہ اسیں کسے صورت الیکشن دا بائیکاٹ نہیں کراں گے کیونکہ الیکشن دا بائیکاٹ کرنا مسئلے دا حل نہیں اے، مسئلے دا حل الیکشن وچ حصہ لینا اے۔ سابق صدر نے آکھیا کہ نواز شریف بارے ایہ آکھناکہ اوہ ختم ہو گئے نیں، انج نہیں اے۔ سیاستدان کدی نہیں مردا، سیاستدان ہمیشہ زندہ رہنا اے۔ نواز شریف نوں موقع دین بارے سوال دے جواب وچ آصف علی زرداری نے آکھیا کہ میں نواز شریف نوں چانس دیواں گا یاں نہیں ایہ فیصلا حالات ویکھ کے ای ہوئے گا۔
