لندن( پاکستان پوائنٹ نیوز10۔جولائی۔2018ء ) حسین نواز اپنے گھر اُتے حملا کرن والیاں خلاف پولیس کول اپڑ گئے، حسین نواز نے اپنے گھر اُتے حملا کرن والے تحریک انصاف دے کارکناں خلاف پولیس نوں درخاست دے دتی اے۔ پولیس برطانوی قانون مطابق کارروائی کرے گی۔ تفصیل مطابق مسلم لیگ (ن) دے قائد نواز شریف تے مریم نواز ایس ویلے لندن وچ نیں۔ نواز شریف تے اوہناں دی دھی مریم نواز نے 13جولائی نوں ملک واپس آن دا فیصلا کیتا اے۔
لندن وچ رہن والے کئی پاکستانیاں نے سزا ہون اُتے ایون فیلڈ ریفرنس دے باہر نواز شریف تے مریم نواز خلاف احتجاج کیتا۔ ایون فیلڈ ریفرنس کیس وچ احتساب عدالت توں سزا پان والے سابق وزیر اعظم نواز شریف اپنے گھر والیاں نال ایون فیلڈوچ رہ رہے نیں۔ ایس موقعے تے لندن وچ موجود نواز شریف دے مخالفاں ولوں وکھالا کیتا گیا۔ پچھلے دیہاڑے وی لندن وچ موجود پاکستانیاں نے ایون فیلڈ اپارٹمنٹس ساہمنے احتجاج کیتا تے چور چور دے نعرے لائے۔
ایس موقعے تے گندے آنڈے وی مارے گئے پر ہن حسین نواز گھر اُتے حملا کرن والیاں خلاف پولیس کول اپڑ گئے نیں۔چیتے رہوے کہ جمعے دے دیہاڑے احتساب عدالت ولوں ایون فیلڈ ریفرنس کیس دا فیصلا سُنایا گیا ۔ فیصلے دے تحت سابق وزیر اعظم نواز شریف نوں 10، اوہناں دی دھی مریم نواز نوں 7تے داماد کیپٹن (ر) صفدر نوں اک سال قید دی سزا سُنائی گئی اے۔ نواز شریف نوں 10ملین پاؤنڈ تے مریم نواز نوں 2ملین پاؤنڈ جرمانہ وی کیتا گیا اے۔
