اسلام آباد( پاکستان پوائنٹ نیوز10۔جولائی۔2018ء ) ایف آئی اے نے آصف زرداری نوں گرفتار نہ کرن دا فیصلا کر لیا۔ ایف آئی اے حکام دا کہنااے کہ آصف زرداری تے فریال تالپور نوں گرفتار نہیں کیتا جائے گا، اوہناں دے جواباں دا جائزہ لواں گے۔ تفصیل مطابق الیکشن وچ کُجھ ای دن رہ گئے نیں تے انج دے ماحول وچ پاکستانی سیاست دیاں دو وڈیاں جماعتاں پریشانی دا شکار نیں۔
جماعتاں دی پریشانی دی سبھ توں وڈی وجہ اوہناں خلاف کیس کُھلنا نیں۔ اک پاسے جمعے دے دیہاڑے احتساب عدالت ولوں ایون فیلڈ ریفرنس کیس دا فیصلا سُنایا گیا ۔ فیصلے دے تحت سابق وزیر اعظم نواز شریف نوں 10، اوہناں دی دھی مریم نواز نوں 7تے داماد کیپٹن (ر) صفدر نوں اک سال قید دی سزا سُنائی گئی اے۔ نواز شریف نوں 10ملین پاؤنڈ تے مریم نواز نوں 2ملین پاؤنڈ جرمانہ وی کیتا گیا اے۔
تے دوجے پاسے سابق صدر آصف علی زرداری تے اوہناں دی بھین فریال تالپور دے ناں وی مبینہ طور اُتے منی لانڈرنگ وچ ملوث ہون دی وجہ توں ای سی ایل وچ پا دتے گئے نیں۔ ایس توں پہلاں صدر زردای دے قریبی ساتھی حسین لوائی نوں ایف آئی اے ولوں گرفتار کرکے اوہناں خلاف مقدمہ وی درج کیتا گیا اے۔ مقدمے دے متن مطابق آصف زارداری تے فریال تالپور دی کمپنی وی منی لانڈرنگ توں فائدہ چُکن والیاں وچ شامل اے۔
زرداری گروپ نے ڈیڈھ کروڑ رُپئے دی منی لانڈرنگ کیتی۔ مقدمے وچ اومنی گروپ دے مالک انور مجید دیاں کمپنیاں دا وی ذکر اے۔ منی لانڈرنگ توں فائدہ چُکن والیاں وچ نزلی مجید، نمرہ مجید، عبدالغنی مجید شامل نیں۔ پر ہن ایف آئی اے حکام دا کہنا اے کہ سابق صدر آصف زرداری تے فریال تالپور نوں گرفتار نہیں کیتا جائے گا۔
