اسلام آباد( پاکستان پوائنٹ نیوز09۔جولائی۔2018ء ) اج پاکستان تحریک انصاف دے چیئرمین عمران خان نے انتخابی منشور 2018دا اعلان کر دتا اے۔ پاکستان تحریک انصاف دے انتخابی منشور وچ بھاشا ڈیم دی اُساری وی شامل اے۔ ایس موقعے تے جدوں اک پرچا کار نے پاکستان تحریک انصاف دے چیئرمین عمران خان توں سوال کیتا کہ کیہ تُسیں کالا باغ ڈیم بنان لئی فنڈ دیو گے؟تے عمران خان نے ایسا جواب دتا کہ رلتی (شرکاء) ہسن لگ پئے۔
عمران خان دا کہنا سی کہ میں فنڈ دیندا نہیں لینا واں۔ عمران خان دا کہنا سی کہ میں تے فنڈ اکٹھے کر کے تھک گیا واں پہلے شوکت خانم ہسپتال لئی فیر نمل یونیورسٹی لئی فنڈ اکٹھا کردا رہیا۔ ایہدے مگروں جو ہور شہراں وچ ہسپتال بنائے گئے اوہناں لئی فنڈ اکٹھے کیتے، ایس لئی میں تے فنڈ دیندا نہیں لینا آں۔ چیتے رہوے کہ پاکستان تحریک انصاف دے چیئرمین عمران خان نے انتخابی منشور دا اعلان کردے ہوئے آکھیا کہ سی پیک توں فائدہ چُکاں گے، زراعت ، صنعت نوں ترقی دیو گے ، اک کروڑ نوکریاں پیدا کراں گے۔ پولیس دا نظام ٹھیک کراں گے۔ خیبرپختونخوا ورگی تعلیم و صحت دیاں سہولتاں دیواں گے۔ پانی دا بحران حل کراں گے۔
