لاہور( پاکستان پوائنٹ نیوز09۔جولائی۔2018ء ) کیہ ملک دے سارے سسٹم نوں عمران خان دے حق وچ کرن دی کوشش کیتی جا رہی اے ؟ عمران خان نوں اگانہ لیان لئی نواز شریف مگروں آصف علی زرداری نوں وی کرپشن مقدمیاں وچ گرفتار کرن دی کوشش ہو رہی اے؟تفصیل مطابق سابق وزیر اعظم نواز شریف نوں احتساب عدالت ولوں سزا سُنا دتی گئی اے۔ نواز شریف نوں دس سال قید دی سزا سُنائی گئی اے جدکہ اوہناں دی دھی مریم نواز نوں 7سال دی سزا سُنائی گئی اے۔
احتساب عدالت دے ایس فیصلے مگروں تحریک انصاف خش وکھالی دیندی اے۔ کیونکہ عمران خان لئی الیکشن 2018وچ جِتن دی آس ودھ گئی اے۔ پر ہن سابق صدر آصف علی زرداری دے حوالے نال خبرساہمنے آئی اے کہ سابق صدر خلاف وی گھیرا تنگ کیتا جا رہیا اے۔ ایس بارے گل بات کردے ہوئے مشہور پرچا کار و تجزیہ نگار عارف نظامی دا کہنا سی کہ زرداری دوالے گھیرا تنگ کرن دا مقصد ایہ وی ہو سکدا اے کہ جے تُسیں سوچ رہے او کہ تُسیں نواز شریف دا ساتھ دیو گے تے سنبھل جاؤ۔
عارف نظامی دا ہور کہنا سی کہ عمران خان لئی حالات نوں بہتر کیتا جا رہیا اے جدکہ سارے ادارے وی عمران خان نوں اقتدار وچ لیان لئی اوہناں دی مدد کر رہے نیں۔ پر ایہدے مگروں وی اک غیر یقینی صورتحال پیدا ہو رہی اے کہ شاید پی ٹی آئی اینیاں سیٹاں لین وچ کامیاب نہ ہو سکے جِنا اوہ سوچ رہی اے۔ عارف نظامی دا ہور کہنا سی کہ جدوں میری آصف علی زرداری نال ملاقات ہوئی تے اوہناں د ا کہنا سی کہ شاید (ن) لیگ نال ساڈے مذاکرات ہون کیونکہ عمران خان تے ساڈے نال اتحاد نہیں کرنا چاہندے۔
پر میرے خیال وچ آصف علی زرداری دی گرفتار ی اینی چھیتی نہیں ہو سکدی۔ چیتے رہوے کہ اج سپریم کورٹ نے جعلی بنک اکاؤنٹس کیس وچ سابق صدر آصف علی زرداری ، اوہناں دی بھین فریال تالپور تے حسین لوائی سنے 13بندیاں نوں 12جولائی نوں سد لیا اے۔
