اسلام آباد،بیجنگ( پاکستان پوائنٹ نیوز09۔جولائی۔2018ء ) چین نے اک راکٹ راہیں پاکستان دے دو سیٹلائٹس نوں خلا وچ چھڈ دتا اے۔ سیٹلائٹس نال پاکستان دی قومی معیشت دی ترقی، لوکائی دی زندگی نوں بہتر بنان تے سماجی ترقی دے فروغ دے لحاظ نال مثبت کردار ادا کیتا جائے گا، سی پیک تے بیلٹ اینڈ روڈ دی اُساری لئی سپیشل ریموٹ سینسینگ انفارمیشن سروس فراہم کیتی جائے گی۔
پیر نوں چائنہ ریڈیو انٹرنیشنل مطابق چین نے جوچھوان نامی سیٹلائٹ لانچنگ سینٹر وچ لانگ مارچ نمردوسی راکٹ راہیں کامیابی نال پاکستان دے بُہتے پندھ(فاصلے) دے سینسینگ سیٹلائٹ نمبر اک تے پاک ٹیس اے 1سیٹلائٹ نوں خلا وچ چھڈ یا۔ سیٹلائٹس مقررہ مدار وچ داخل ہو گئے نیں۔ ایہ چین و پاکستان وچکار خلائی لحاظ نال دوجی وار تعاون اے۔ پتا لگا اے کہ پاکستان دے بُہتے پندھ دا سینسینگ سیٹلائٹ نمبر 1 چائنا اکیڈمی آف خلائی ٹیکنالوجی دے تحت اک کمپنی ولوں پاکستان لئی تیار کیتا گیا اک آپٹیکل ریموٹ سینسینگ سیٹلائٹ اے۔
جو پاکستان دے لینڈ لیورسز دی تحقیق، ماحول دے تحفظ، آفات دی نگرانی و انتظام، فصلاں دا تخمینہ تے شہری منصوبہ بندی سنے ہور شعبیاں وچ ورتیا جائے گا۔ جیہدے نال پاکستان دی قومی معیشٹ دی ترقی، لوکائی دی زندگی نوں بہتر بنان تے سماجی ترقی دے فروغ دے لحاظ نال مثبت کردار ادا کیتا جائے گا۔ایس توں وکھ سیٹلائٹ راہیں چین پاک اقتصادی راہداری تے دی بیلٹ اینڈ روڈ دی اُساری لئی سپیشل ریموٹ سینسینگ انفارمیشن سروس فراہم کیتی جائے گی۔
پاک ٹیس اے1سیٹلائٹ پاکستان ولوں آپ تیار کیتا گیا سائنسی ٹیسٹ سیٹلائٹ اے۔ چین دے تعاون نال پاکستان دے سیٹلائٹس نوں خلا وچ گھلنا پاکستانی تاریخ دی اک اہم ترین کامیابی قرار دتا جا رہیا اے۔ سوشل میڈیا اُتے راکٹ راہیں سیٹلائٹ خلا وچ گھلن دی ویڈیو وی وائرل ہو رہی اے۔
