اسلام آباد( پاکستان پوائنٹ نیوز07۔جولائی۔2018ء ) سابق وزیر اعظم نواز شریف دے دامادکیپٹن (ر) صفدر نوں گرفتار کر لیا گیا۔ نجی ٹی وی (24)نے دعوا کیتا اے کہ کیپٹن (ر) صفدر نوں گرفتار کر لیا گیا۔ نجی ٹی وی چینل نے اپنی رپورٹ وچ دسیا کہ کیپٹن (ر) صفدر نوں ا ج سویرے 4وجے ایبٹ آباد توں گرفتار کیتا گیا اے۔ دوجے پاسے ڈی آئی جی ایبٹ آباد نے آکھیا اے کہ گرفتاری دے حوالے نال اجے حکم نہیں ملیا۔
تحریری حکم ملدے ای کیپٹن (ر) صفدر نوں گرفتار کر لیا جائے گا۔پر نیب نے وی کیپٹن (ر) صفدر دی گرفتاری دیاں خبراں نوں رد کر دتا اے۔نیب وسیلیاں نے دسیا کہ کیپٹن (ر) صفدر نوں وارنٹ گرفتاری جاری ہون مگروں گرفتار کیتا جائے گا۔ سابق وزیر اعظم نواز شریف، مریم نواز تے کیپٹن (ر) صفدر دے وارنٹ گرفتاری پیر نوں حاصل کیتے جان گے۔ میڈیا وسیلیاں دا کہنا اے کہ کیپٹن (ر) صفدر پاکستان وچ ای نیں ،اوہ مانسہرہ وچ اپنی انتخابی مہم وچ رُجھے (مصروف) ہون دی وجہ توں پچھلے دیہاڑے عدالت وچ پیش نہیں ہوسکے۔
چیتے رہوے کہ احتساب عدالت ولوں ایون فیلڈ ریفرنس کیس دا فیصلا کل سُنایا گیا سی۔ فیصلے دے تحت سابق وزیر اعظم نواز شریف نوں 10، اوہناں دی دھی مریم نواز نوں 7تے داماد کیپٹن (ر) صفدر نوں اک سال قید دی سزا سُنائی گئی اے۔ نواز شریف اُتے 10ملین پاؤنڈ تے مریم نواز اُتے 2ملین پاؤنڈ جرمانہ وی کیتا گیا اے۔
