سوات( پاکستان پوائنٹ نیوز06۔جولائی۔2018ء ) پاکستان تحریک انصاف دے چیئرمین عمران خان نے آکھیا اے کہ احتساب عدالت دے فیصلے اُتے قوم شکرانے دے نفل پڑھے، اوہناں دی بدقسمتی کہ جے آئی ٹی وچ دو بریگیڈیئر سن جو وِکے نہیں، ضیاء الحق دے زمانے وچ کرپشن شروع ہوئی، ایہ پاکستان وچ شروعات اے، ہن وڈے ڈاکو اقتدار وچ نہیں جیلاں وچ جان گے، 25جولائی نوں نویں پاکستان دی بنیاد رکھاں گے۔
اوہناں نے سوات وچ عوامی جلسے نال خطاب کرد ے ہوئے آکھیا کہ رب دا شکر ادا کرنا واں۔ اوہناں نے آکھیا کہ ضیاء الحق دے زمانے وچ کرپشن شروع ہوئی، اودوں چھانگا مانگا دی سیاست شروع ہوئی۔ جدوں کرپشن شروع ہوئی تے فیر پاکستان پچھے جاندا گیا۔ اوہناں نے آکھیا کہ سارے پاکستانیاں نوں رب دا شکر ادا کرنا چاہیدا تے نفل پڑھنے چاہیدے۔ اوہناں نے آکھیا کہ ایہ پاکستان وچ شروعات اے کہ ہن وڈے وڈے ڈاکو جیلاں وچ جان گے۔
عمران خان نے نوجواناں نوں مخاطب کردے ہوئے آکھیا کہ ایہ تہاڈا پیسا چوری کیتا گیا اے۔ پاکستان اُتے قرضے کرپشن دی وجہ توں نیں۔ سوات دے واسیو!آن والے الیکشن وچ لوکاں کول جانا تے لوکاں نوں ووٹ پان لئی باہر کڈھنا۔ مینوں آس اے کہ اسیں 25جولائی نوں نویں پاکستان دی بنیاد رکھاں گے۔ نواز شریف دے لندن وچ محل نیں۔ میں پُچھیا سی کہ لندن وچ جو فلیٹس نیں دسن کہ ایہ پیسا کتھوں آیا۔
کوئی سُنن والا نہیں سی۔ کسے نوں کوئی فکر نہیں سی کہ غریب لوکائی دا پیسہ باہر جا رہیا اے۔ فیر جدوں رب دی پکڑ آئی تے پاناما پیپرز وچ انکشاف ہوئے۔عمران خان دا کہنا سی کہ نواز شریف دے پُتر نے آکھیا کہ الحمد اللہ ایہ ساڈے فلیٹس نیں۔ مریم نواز نے جدوں 2011وچ آکھیا کہ لندن تے کیہ ساڈی تے پاکستان وچ وی کوئی جائیداد نہیں اے۔ جدوں میں آواز چُکی تے میرا مونہ بند کرن لئی مقدمے کیتے گئے۔
میرے اُتے کیس کیتا گیا کہ میں کرکٹ وچ پیسا کمایا۔ سپریم کورٹ نے فیصلے وچ مینوں صادق و امین آکھیا۔ اوہناں دی بدقسمتی کہ جے آئی ٹی وچ دو بریگیڈیئر سن، جو وِکے نہیں۔ سپریم کورٹ نے نواز شریف نوں گارڈ فادر قرار دتا۔ اوہناں نے اوہ کم کیتا جو پاکستان دا دشمن کردا۔ اوہناں نے آکھیاکہ ممبئی حملے ساڈی فوج نے کروائے ، جیہدے نال پاکستان دی پوری دنیا وچ بے عزتی ہوئی۔
