اسلام آباد( پاکستان پوائنٹ نیوز06۔جولائی۔2018ء ) حسن تے حسین نواز دی سزا دیاں تفصیلاں وی ساہمنے آ گئیاں، سابق وزیر اعظم نواز شریف دے دوواں پُتراں دی گرفتاری لئی دائمی وارنٹ جاری کر دتے گئے نیں۔ تفصیل مطابق اج احتساب عدالت ولوں ایون فیلڈ ریفرنس کیس دا فیصلا سُنا دتا گیا اے۔ فیصلے دے تحت سابق وزیر اعظم نواز شریف نوں 10تے اوہناں دی دھی مریم نواز نوں 7تے داماد کیپٹن (ر) صفدر نوں اک سال قید دی سزا سُنائی گئی اے۔
نواز شریف اُتے 10ملین پاؤنڈ تے مریم نواز اُتے 2ملین پاؤنڈ جرمانہ وی کیتا گیا اے۔ نواز شریف تے مریم نواز لندن وچ موجود نیں۔پر ہن نواز شریف دے دوواں پُتراں دی سزا بارے تفصیلاں ساہمنے آئیاں نیں۔ عدالت وچ دوواں بندیاں دا ٹرائل تے فیر ایہدے مگروں اوہناں دی سزا طے کیتی جائے گی۔ ۔ عدالت نے قرار دتا کہ قطری خط جھوٹھا تے جعلی سی۔ احتساب عدالت نے نواز شریف دی ساری جائیداد ضبط کرن تے ایون فیلڈ اپارٹمنٹس دی قرقی دا حکم وی دتا اے۔ایس توں وکھ کیپٹن (ر) صفدر ایس ویلے مانسہرہ وچ انتخابی مہم چلا رہے نیں۔ احتساب عدالت توں سزا ہون مگروں پولیس دی اک اُچیچی ٹیم کیپٹن (ر) صفدر نوں گرفتار کرن لئی مانسہرہ چلی گئی اے۔
