اسلام آباد( پاکستان پوائنٹ نیوز06۔جولائی۔2018ء ) احتساب عدالت وچ ایون فیلڈ ریفرنس کیس دا فیصلا سُنا دتا گیا اے۔ فیصلے دے تحت سابق وزیر اعظم نواز شریف نوں 10تے اوہناں دی مریم نواز نوں 7تے داماد کیپٹن (ر) صفدر نوں اک سال قید دی سزا سُنائی گئی اے۔ نواز شریف اُتے 10ملین پاؤنڈ تے مریم نواز اُتے 2ملین پاؤنڈ جرمانہ وی کیتا گیا اے۔ نواز شریف تے مریم نواز لندن وچ موجود نیں جدکہ کیپٹن (ر) صفدر ایس ویلے مانسہرہ وچ انتخابی مہم چلا رہے نیں۔
احتساب عدالت توں سزا ہون مگروں پولیس دی اک اُچیچی ٹیم کیپٹن (ر) صفدر نوں گرفتار کرن لئی مانسہرہ چلی گئی اے۔ چیتے رہوے کہ اج احتساب عدالت نے ایون فیلڈ ریفرنس کیس دا فیصلا سُنا دتا۔ میڈیا رپورٹ مطابق احتساب عدالت دے بند کمرے وچ جج محمد بشیر نے ملزماں دے وکیلاں نوں روسٹرم اُتے سد کے ایون فیلڈ ریفرنس کیس دا فیصلا سُنایا۔ احتساب عدالت نے ایون فیلڈ ریفرنس کیس وچ سابق وزیر اعظم نواز شریف نوں 8ملین پاؤنڈ تے مریم نواز شریف نوں 2ملین پاؤنڈ جرمانہ کیتا۔
عدالت نے جائیداد ضبط کرن تے اوہنوں ویچ کے پیسے قومی خزانے وچ جمع کروان دا حکم وی دتا۔ فیصلا سُنان ویلے عدالتی کمرہ بھریا ہویا سی پر مسلم لیگ (ن) دی مرکزی قیادت عدالت دے اندر یاں باہر وکھالی نہیں دتی۔ جدکہ میڈیا نوں وی کمرہ عدالت توں باہر کڈھ دتا گیا سی۔
