اسلام آباد( پاکستان پوائنٹ نیوز05۔جولائی۔2018ء ) ایگزیکٹ جعلی ڈگری کیس دا فیصلا سُنا دتا گیا۔ ایگزیکٹ دے سی ای او شعیب شیخ سنے 23ملزماں نوں 7سال قید دی سزا سُنا دتی گئی۔ تفصیل مطابق دنیا بھر وچ جعلی ڈگری دا کاروبار کرن والی کمپنی ایگزیکٹ دے کالے دھندے دا انکشاف 18مئی2015نوں امریکی اخبار نیویارک ٹائمز نے کیتا۔ ایگزیکٹ دا جعلی ڈگریاں دا سکینڈل دنیا بھر وچ پاکستان لئی بدنامی دی وجہ وی بنیا، کیونکہ ایگزیکٹ جعلی ڈگریاں، پیسے چھاپن تے لوکاں نوں بلیک میل کرن دا کاروبار دنیا بھر وچ کھلر گیا سی۔
چیف جسٹس پاکستان نے وی ایگزیکٹ سکینڈل دا آپ نوٹس لتا سی۔ پر اج ایگزیکٹ جعلی ڈگری کیس دا فیصلا سُنا دتا گیا۔ ڈسٹرکٹ اینڈ سیشن جج ممتاز حسین نے ایگزیکٹ جعلی ڈگری کیس دا فیصلا سُنایا۔ ایگزیکٹ دے سی ای او شعیب شیخ سنے 23ملزماں نوں 7سال قید دی سزا سُنائی گئی۔ عائشہ شعیب شیخ سنے تن ملزماں نوں بری کر دتا گیا۔ سارے ملزماں نوں 5,5لکھ رُپئے جرمانہ دین د اوی حکم دتا گیا۔ شعیب شیخ سنے ہور ملزماں نوں مجموعی طور اُتے 20سال قید دی سزا سُنائی گئی۔
