اسلام آباد( پاکستان پوائنٹ نیوز05۔جولائی۔2018ء ) پاکستان تحریک انصاف دے چیئرمین عمران خان نے آکھیا اے کہ نواز شریف صاحب!تُسیں فیصلا اخباراں وچ پڑھو گے، قانون دی اُچیائی لئی نواز شریف خلاف فیصلا کل ای سُنایا جائے، نیب نے آکھیا کہ 25جولائی تیکر کسے نوں نہیں گرفتار کراں گے، اوہدی نندیا(مذمت) کرنا واں، ظفر علی شاہ ذہنی طور اُتے پہلے ای پارٹی وچ رلتی ہو گئے سن۔
اوہناں نے اج مسلم لیگ (ن) دے باغی رہنما ظفر علی شاہ دے گھر اوہناں دی پی ٹی آئی وچ رلت مگروں میڈیا نال گل بات کردے ہوئے آکھیا کہ نواز شریف نے ارباں رُپئے چوری کیتے پر کسے دا ضمیر نہیں جاگیا۔ نواز شریف نے اسمبلی وچ کھلوکے آکھیا کہ 2006وچ فیلٹس خریدے۔ مسلم لیگ (ن) دی لیڈر شپ نے ایہ نہیں ویکھیا کہ (ن) لیگ دا لیڈر پیسے چوری کر کے باہر لے جا رہیا اے۔
میں ٹی وی اُتے ویکھیا سی کہ ظفر علی شاہ واحد بندہ سی جو نواز شریف خلاف بولدا سی، اوہدا دفاع نہیں کر دا سی۔عمران خان دا ظفر علی شاہ نوں مخاطب کردے ہوئے کہنا سی کہ تُسیں ذہنی طور اُتے پہلے ای تحریک انصاف وچ رلتی ہو گئے سو۔ اوہناں نے آکھیا کہ ظفر علی شاہ نے 1897وچ اسلام آباد وچ مینوں الیکشن وچ ہرایا سی۔ ظفر علی شاہ تے اوہناں دے ساتھیاں دی رلت اُتے اوہناں نوں جی آیاں آکھنا واں۔
اوہناں نے آکھیاکہ ویلا ثابت کرے گا جو ظفر علی شاہ نے فیصلا کیتا اوہ ملک لئی درست اے۔ عمران خان نے آکھیاکہ جمہوریت وچ سبھ نوں نال لے کے ٹُرنا پیندا اے۔ پارلیمنٹ وچ جان دا فائدہ کیہ سی؟ دوویں جماعتاں نے مُک مُکا کیتا ہویا سی۔اوہناں نے آکھیا کہ نواز شریف نے 300ارب دا جواب دینا اے۔ عمران خان نے آکھیا کہ کینسر بہت وڈی بیماری اے۔ میری ماں نوں وی کینسر سی۔ ساڈی کلثوم نواز نال ہمدردی اے۔ پر ایہدا ایہ مطلب نہیں اے کہ اوہنوں استعمال کیتا جائے۔نیب دا فیصلا کل ای سُنایا جائے ۔
