اسلام آباد( پاکستان پوائنٹ نیوز04۔جولائی۔2018ء ) سپریم کورٹ نے کالا باغ ڈیم دی اُساری (تعمیر) بارے کیس دا فیصلا سُنا دتا، بھاشا تے مہمند ڈیم ترجیحی بنیاداں اُتے بنائے جان، فیصلا چیف جسٹس دی سربراہی وچ چار رکنی بنچ نے سنایا۔ تفصیل مطابق سپریم کورٹ آف پاکستان وچ ڈیمز دی اُساری بارے کیس دی سنوائی ہوئی۔ سنوائی مگروں کیس دا فیصلا محفوظ کر لیا گیا سی۔
جو ہن سُنا دتا گیا اے۔ سپریم کورٹ وچ چیف جسٹس دی سربراہی وچ چار رکنی بنچ نے مختصر فیصلا سُنایا۔ بنچ وچ جسٹس عمر عطا بندیال، جسٹس اعجاز الاحسن تے جسٹس منیب اختر شامل سن۔ سپریم کورٹ نے بھاشا تے مہمند ڈیم دی ترجیحی تے فوری اُساری دا حکم دتا اے۔ عدالتی حکم وچ آکھیا گیا اے کہ زندگی بنیادی حق اے تے پانی بغیر زندگی ممکن نہیں۔ سپریم کورٹ نے چیئرمین واپڈا دی سربراہی وچ عملدرآمد کمیٹی وی بنا دتی اے۔
جدکہ رجسٹرار سپریم کورٹ دے ناں عوامی عطیات حاصل کرن لئی اکاؤنٹ کھولن دا حکم وی دتا گیا اے۔ سپریم کورٹ نوں ڈیماں دی اُساری بارے پیش رفت بارے مسلسل دسن دا وی حکم دتا گیا اے۔ کیس دی سنوائی دوران چیف جسٹس نے آکھیا کہ بھاشا ڈیم دی اُساری اُتے کسے نوں اعتراض نہیں اے۔ اوہناں نے آکھیا کہ بھاشاتے منڈا ڈیم اُتے سبھ دی سانجھ اے۔ سنوائی دوران وزارت پانی و بجلی دے حکام نے آکھیاکہ پاکستان دنیا دا واحد ملک سی جیہدی کوئی واٹر پالیسی نہیں سی۔ پاکستان نے 2018وچ اپنی واٹر پالیسی منظور کیتی۔
