ٹیکسلا( پاکستان پوائنٹ نیوز04۔جولائی۔2018ء ) سابق وزیر داخلا چودھری نثار علی خان دا کہنا اے کہ نہ چاہندے ہوئے وی پارٹی صدارت لئی نواز شریف نوں ووٹ دتا۔ ایون فیلڈ ریفرنس فیصلے مگروں میرے تے میاں صاحب دے اختلافات قوم ساہمنے رکھاں گا۔ تفصیل مطابق سابق وزیر داخلا چودھری نثار علی خان دا ٹیکسلا وچ نیوز کانفرنس کردے ہوئے کہنا سی کہ نواز شریف دسن اوہناں نوں میرے کس بیان اُتے دُکھ ہویا۔
اداریاں نال جھیڑا نہ کرن دے بیان اُتے میاں صاحب نوں دُکھ ہویا؟میں غلط آکھیا؟چودھری نثار دا کہنا سی کہ مینوں اجلاساں وچ سدنا بند کر دتا گیا، ایس لئی میرا موقف ساہمنے نہیں آ سکیا۔ شیخ مجیب تے ممبئی حملیاں دے حوالے نال نواز شریف دا بیان پاکستان مخالف سی۔ ممبئی حملا کیس بارے بیان ملکی سلامتی خلاف سی۔ چودھری نثار علی خان دا کہنا سی کہ پرسوں فیصلا ہو جائے گا، فیر سبھ کُجھ دساں گا، ایون فیلڈ ریفرنس فیصلے مگروں میرے تے میاں صاحب دے اختلافات قوم ساہمنے رکھاں گا۔
چودھری نثار علی خان دا مریم نواز بارے کہنا سی کہ اوہ بولدیاں پہلے تے سوچدیاں بعدوں نیں۔ اوہناں دا ہور کہنا سی کہ جیپ دے نشان اُتے رہی سہی کسر لندن وچ پوری ہو گئی اے۔ چودھری نثار دا کہنا سی کہ میں تے سیاسی مخالفاں نوں کھوتا نہیں آکھ سکدا، میں تے کسے چھوٹے نوں وی اوئے نہیں آکھیا۔ نہ چاہندے ہوئے وی پارٹی صدارت لئی نواز شریف نوں ووٹ دتا۔ہن کلثوم نواز دی طبیعت وچ کُجھ بہتری آئی اے جیہدی وجہ توں میں کُجھ نکات ساہمنے رکھ رہیا واں۔ پر شریف خاندان خلاف ایون فیلڈ ریفرنس فیصلے مگروں میرے تے میاں صاحب دے اختلافات قوم ساہمنے رکھاں گا۔
