اسلام آباد( پاکستان پوائنٹ نیوز04۔جولائی۔2018ء ) اسلام آباد ہائی کورٹ وچ اج ختم نبوت قانون وچ ترمیم بارے کیس دی سنوائی ہوئی۔ میڈیا رپورٹ مطابق عدالت نے ختم نبوت قانون وچ ترمیم دے معاملے اُتے راجا ظفر الحق دی رپورٹ ساہمنے لیان دا حکم جاری کر دتا۔ حکم اسلام آباد ہائی کورٹ دے جج جسٹس شوکت عزیز صدیقی نے جاری کیتا۔ ختم نبوت دے قانون وچ تبدیلی خلاف کیس دا تفصیلی فیصلا جسٹس شوکت عزیز صدیقی نے لکھیا۔
تفصیلی فیصلا 172صفحیاں دا اے۔ فیصلے وچ راجا ظفر الحق کمیٹی دی رپورٹ دے کُجھ اہم نکات وی شامل کیتے گئے نیں۔ تفصیلی فیصلے وچ آکھیا گیا کہ کسے مسلم نوں ایہ اجازت نہیں کہ اوہ اپنی شناخت نوں غیر مسلماں وچ لُکائے۔ بدقسمتی نال ایس واضح معیار مطابق ضروری قانون سازی نہیں کیتی جا سکی۔ آئین خلاف سازش کرن والیاں نوں پارلیمنٹ بے نقاب نہ کر سکی۔
تفصیلی فیصلے وچ آکھیا گیا کہ ختم نبوتﷺ دے معاملے اُتے ارکان پارلیمنٹ دی وڈی گنتی اہمیت دین وچ ناکام رہی۔ پارلیمنٹ ختم نبوت دے تحفظ نوں یقینی بنان لئی اقدامات کرے۔ نجی ٹی وی چینل دے وسیلیاں مطابق راجا ظفر الحق کمیٹی دی رپورٹ وچ ناں لے کے دسیا گیا اے کہ سب کمیٹی دی ممبر انوشے رحمان تے سب کمیٹی دے کنونیئر زاہد حامد جو اوس ویلے وفاقی وزیر سن، ایس معاملے وچ ملوث نیں۔
رپورٹ وچ اوہناں دوواں دے ناں آئے نیں تے آکھیا گیا اے کہ دوویں لیگی رہنماواں نے حلف نامیاں وچ تبدیلی کرن، ری ڈرافٹنگ کرن تے اوہناں نوں فیر قانونی شکل وچ لیان دا کم کیتا۔ایس لئی قانون وچ ترمیم دی ساری ذمے واری انوشے رحمان تے زاہد حامد اُتے ہوندی اے۔چیتے رہوے کہ مسلم لیگ (ن) نے ختم نبوتﷺ قانون وچ ترمیم دے معاملے اُتے وفاقی وزیر قانون زاہد حامد توں استعفا لے لیا سی پر انوشے رحمان خلاف کوئی کارروائی نہیں ہوئی سی۔
