اسلام آباد( پاکستان پوائنٹ نیوز03۔جولائی۔2018ء ) نواز شریف دے واپسی دا اعلان کردے ای نگران حکومت نے وی وڈا فیصلا کر لیا اے۔ نگران وزیر اطلاعات دا کہنا سی کہ سابق وزیراعظم دا ناں ای سی ایل وچ پان دا فیصلا اوہناں دی ملک واپسی اُتے ہوئے گا ۔ تفصیل مطابق سابق نااہل قرار دتے گئے وزیر اعظم نواز شریف تے اوہناں دے خاندان خلاف نیب وچ جاری کیسز آخری مرحلے وچ نیں۔
نیب ولوں جو کیسز دائر کیتے گئے اوہ نواز شریف، مریم، حسن ، حسین نواز تے اسحاق ڈار خلاف نیں۔ ایہناں کیساں نوں پچھلے ورھے نواز شریف نوں نااہل قرار دتے جان مگروں سپریم کورٹ دے حکم اُتے کھولیا گیا سی۔ دوجے پاسے مریم نواز تے نواز شریف نے اک ہفتے وچ ملک واپسی دا اعلان کر دتا اے۔ ایس حوالے نال گل بات کرد ے ہوئے وزیر قانون و انصاف، اطلاعات و نشریات سید علی ظفر نے آکھیاکہ اے کہ سابق وزیر اعظم نواز شریف دا ناں ای سی ایل وچ پان دا حتمی فیصلا اوہناں دی ملک واپسی اُتے کیتا جائے گا کیونکہ ایس معاملے اُتے متعلقہ بندے دی پاکستان وچ موجودگی ضروری اے۔
اوہناں دا کہنا سی کہ حسن تے حسین نواز نوں پاکستان لیان لئی قانونی طریقہ کار مطابق متعلقہ وفاقی ایجنسی کم کرے گی ۔ اوہناں دا ہور کہنا سی کہ برطانیہ نال ملزماں دے تبادلے دا سمجھوتا نہیں اے تے نہ ای باہرلیاں عدالتاں ملزماں نوں دوجے ملکاں دے سپرد کرن دا فیصلا کردیاں۔
