اوکاڑہ کینٹ( پاکستان پوائنٹ نیوز02۔جولائی۔2018ء )ڈاکٹر عبدالقدیر خان موومنٹ پاکستان دے مرکزی چیئرمین عابد حُسین بودلہ نے اپنے سارے ساتھیاں سنے این اے 141دے اُمیدوار پیر سید صمصام علی شاہ بخاری دی حمایت دا اعلان کر دِتا۔ عابد حُسین بودلہ دا آکھنا اے کہ سید صمصام علی شاہ نے ہمیش غریب تے کسان لئی آواز چُکی اے۔
صمصام شاہ ورگے لوکیں پاکستان نُوں خُش حال بناون وچ اہم کردار نبھا سکدے نیں۔مرکزی چیئرمین ڈاکٹر اے کیو خان موومنٹ عابد حُسین بودلہ دا آکھنا اے کہ جدوں تیک چنگے تے ایماندار لوکیں اگّے نہیں آون گے اودوں تیک پاکستان ترقی نہیں کر سکدا‘ مُلک لُٹن والیاں دا ٹرائل ہونا چاہیدا اے۔ ڈاکٹر عبدالقدیر خان پاکستان نُوں لندن توں وی ودھ سوہنا تے محفوظ بنانا چاہندے نیں پر سیاست دان تے کرپٹ ادارے پاکستان دی ترقی نہیں چاہندے۔
قدیر خان نے اپنی صرف وِیہہ فیصد صلاحیتاں نال پاکستان نُوں ایٹمی پاور بنایا۔ 80 فیصد نال پاکستان نُوں ایشین ٹائیگر بنا سکدے نیں پر ہر پاسے مایوسی نظر آ رہی اے۔ ہُن ویلا اے چنگے تے ایماندار لوکاں نُوں ووٹ دے کر اپنے مستقبل نُوں چنگا بنایا جا سکے تے ڈاکٹر عبدالقدیر نے محسوس کیتا کہ بھارت نے پنج ایٹمی دھماکے کیتے تے ایس دے نال ای اوس دی وزیر میڈیا اُتے رولا پا رہے سن جیویں اوہ پاکستان نُوں کجھ پلاں دی اندر ای چیر پاڑ کے رکھ دیون گے تے آزاد کشمیر تاں پکے ہوئے پھل وانگوں اوہناں دی گود میں آ ڈِگے گا۔
پر دُنیا نے کھُلیاں اکھاں نال ایہہ منظر ویکھیا کہ صرف دو ای ہفتیاں مگروں پاکستان نے 6 ایٹمی دھماکے کر کے نہ صرف بھارتی نیتاواں دیاں نیندراں اُڈا دِتیاں سگوں ایٹم بم رکھن والی پہلی اسلامی مملکت بنن اُتے پُورے عالمِ اسلام میں خوشی دی لہر دوڑ پئی۔ ایہو اوہ عظیم کارنامہ سی جس اُتے قوم نے اپنے محب وطن سپُوت ڈاکٹر عبدالقدیر خان نُوں ’محسنِ پاکستان‘ دے لقب نال نوازیا۔
پر عالمِ کُفر نُوں پاکستان ورگے مُلک دا ایٹمی طاقت بننا تے ایس ایٹم بم دے رچنہار جناب ڈاکٹر عبدالقدیر خان دا ہیرو بننا کتھے وارا کھاندا سی ایسے لئی اوہناں نے پہلے پاکستان اُتے حکمرانی کرن والیاں اپنی کٹھ پُتلیاں راہیں ایس عظیم انسان تے قوم دے محسن نُوں ذلیل تے رُسوا کرن تے اوس نُوں گمنامی دے انھیریاں وچ دِھکّن دی کوشش کیتی تے ایس مگروں پاکستان وچ اک منصوبے راہیں دہشتگردی کھلار کے ایس نُوں کمزور توں کمزور کرن تے اخیر ایس نُوں ناکام ریاست قرار دوا کے ایس دے ایٹم بم دا کنڈھا کڈھن دے مگر پئے نیں پر ایس ویلے تیک اوس دیاں ایہہ دوہاں مکروہ سازشاں بھیڑی طرحاں ناکامی دا مُونہہ ویکھ چُکیاں نیں
