اسلام آباد( پاکستان پوائنٹ نیوز30۔جون2018ء ) پاکستان تحریک انصاف دے چیئرمین عمران خان نے آکھیا اے الیکشن وچ نواز شریف تے زرداری اکٹھے ہون گے، لوک اوہناں نوں ووٹ نہ دین ، اقتدار وچ آ کے اداریاں تے ٹیکس نظام نوں ٹھیک کراں گے۔ 23تاریخ نوں پریڈ گراؤنڈ وچ جلسہ کراں گا۔ اوہناں نے اج کنونشن سنٹر اسلام آباد وچ پارٹی ورکراں نال خطاب کردے ہوئے آکھیا کہ اج کارکناں نال کُجھ گلاں کرنا چاہنا واں۔
21سال توں کوششاں کر رہیا واں۔ کارکن مقابلے لئی کسے نوں کمزور نہ سمجھن۔ ساڈھے چار ہزار لوکاں نے ٹکٹاں لئی اپلائی کیتا سی۔ میں کرکٹ کھیڈدا سی تے گیارھاں کھڈاری سلیکٹ کرنے ہوندے سن پر باقیاں دی سپورٹ وی ہوندی اے۔ جیہڑے لوکاں نوں ٹکٹ نہیں ملیا اوہناں نوں تکلیف ہوئی ہوئے گی پر جماعت جدوں اقتدار وچ آئے تے اوہدے وچ نظریاتی کارکناں لئی بڑی تھاں ہوندی اے۔
اوہناں نے آکھیا کہ سوانیاں دیاں مخصوص سیٹاں وڈا عذاب اے۔ ساڈیاں سینئر تے 20سال پرانیاں سوانیاں چاہندیاں کہ اوہناں نوں ٹکٹ ملنا چاہیدا۔ کسے سوانی نے پچھلے کُجھ ورھیاں وچ بہت کم کیتا۔ ایس طرحاں دیاں سوانیاں نوں وی ٹکٹ دینا سی، جو قانون بنانا جاندیاں ہون۔ ایس لئی ٹکٹ دی ونڈ عذاب سی۔ آؤندے ویلے نوں ٹکٹ اوہنوں دیواں گے جو پارٹی الیکشن وچ اُتے آن گے۔
آن والے ویلے وچ ایس عذاب وچ نہیں پواں گے۔ اوہناں نے آکھیا کہ الیکشن وچ سانوں اللہ نے موقع دتا اے کہ ایہ جو 2پاکستان بنے ہوئے نیں۔ دو جماعتاں نے پاکستان نوں یرغمال بنایا ہویا اے۔ 300ارب رُپئے منی لانڈرنگ نال باہر لیجائے گئے۔ اوہناں دی طاقت پیسہ سی۔ پیو تے دھی روندے پھر رہے کہ ’ہمیں کیوں نکالا‘۔ساڈے نال زیادتی ہوئی اے، انج رو رہے جیویں بہت وڈا ظلم ہویا۔
پاناما لیکس وچ ایہ لوک رنگے ہتھوں پھڑ گئے نیں۔ جے نواز شریف دی تھاں کوئی ہور ہوندا تے اڈیالا جیل وچ ہوندا۔ اوہناں نے آکھیا کہ شریف برادران نے اک وی ایس طرحاں دا ہسپتال نہیں بنایا جتھے اوہ علاج کروا سکن۔ پہلے نواز شریف علاج لئی باہر گیا۔ اسحاق ڈار دی فوٹو ویکھ کے مینوں ترس آیا کہ ایہ بیمار اے؟پتا نہیں اوہ کیہڑے سٹوڈیو دا بسترا سی یاں ہسپتال سی۔ایس طرحاں زرداری وی سِدھا جہاز پھڑدا اے تے دبئی چلا جاندا اے۔
