لاہور( پاکستان پوائنٹ نیوز29۔جون2018ء ) تحریک انصا ف دے چیئرمین عمران خان دی سابق بیوی ریحام خان نے آکھیا اے کہ مینوں فخر اے میں جمائما ورگی نہیں آں، میں کوئی یہودی یاں مغربی سوانی نہیں آں، میرا ویاہ تے طلاق مختلف حالات وچ ہوئی، میں اپنے بھرا، والد یاں شوہر اُتے کدی بھار نہیں بنی، اپنا کمانی تے اپنا کھانی آں۔ اوہناں نے نجی ٹی وی چینل دے پروگرام وچ گل بات کردے ہوئے آکھیا کہ میں جمائما توں بہت مختلف سوانی آں۔
میرے تے جمائما وچ بہت فرق اے۔ میں مختلف خاندان توں تعلق رکھدی آں۔ میں عمران خان نال ویاہ اک مختلف نیت نال کیتا جدکہ میرا ویاہ تے طلاق وی مختلف حالات وچ ہوئی۔ اوہناں نے آکھیا کہ میں کسے طرحاں وی نہیں چاہندی کہ لوک جمائما یاں میرے وچ کوئی مشابہت ویکھن یاں سانوں رلان دی کوشش کرن۔ مینوں فخر اے کہ میں جمائما وانگ نہیں آں۔میں اج تیکر اپنے بھرا، والد یاں اپنے شوہر کسے اُتے بھار نہیں بنی۔
میں اپنا کمانی آں تے اپنا کھانی آں۔ میں کوئی یہودی یاں مغربی سوانی نہیں آں۔ ریحام خان نے ہور اک سوال دے جواب اُتے آکھیا کہ مینوں آس اے کہ کتاب الیکشن توں پہلاں آ جائے گی، مشکل اے پر میں اپنی پوری کوشش کر رہی آں کہ کتاب نوں چھاپ لواں۔ ہن میں کوشش کر رہی آں کہ کتاب الیکشن توں پہلاں آ جائے کیونکہ جس طرحاں دا تاثر سارے دے رہے نیں میری کتاب ایس توں زرہ ہٹ کے اے۔
