لاہور( پاکستان پوائنٹ نیوز28۔جون2018ء ) سابق وزیر اعظم خلاف بغاوت دا مقدمہ، نواز شریف تے خاقان عباسی نوں 29جون نوں لاہور ہائی کورٹ نے سد لیا ۔ نواز شریف تے شاہد خاقان عباسی خلاف بغاوت دا مقدمہ درج کرن دی درخاست ایڈووکیٹ اظہر صدیق نے دائر کیتی سی۔تفصیل مطابق ایڈووکیٹ اظہر صدیق نے سابق وزیر اعظم شاہد خاقان عباسی تے نواز شریف خلاف غداری دا مقدمہ درج کرن لئی لاہور ہائی کورٹ وچ درخاست دائر کیتی سی۔
ایس درخاست وچ استدعا کیتی گئی سی کہ نواز شریف نے ملک مخالف جھیڑوا (متنازعہ) انٹرویو دے کے قوم نال غداری کیتی سی، جیہدے اُتے سابق وزیر اعظم نواز شریف تے شاہد خاقان عباسی خلاف آرٹیکل 6دے تحت مقدمہ درج ہونا چاہیدا۔ درخاست وچ ایہ وی استدعا کیتی گئی سی کہ کیونکہ نواز شریف دا انٹرویو جھیڑوا تے بغاوت دے زمرے وچ آؤندا اے ایس لئی اوہناں خلاف کارروائی ہونی چاہیدی۔
ایہدے اُتے عدالت ولوں تحریری حکم جاری کرد ے ہوئے نواز شریف تے شاہد خاقان عباسی نوں کل 29جون نوں لاہور ہائی کورٹ نے سد دے ہوئے اوہناں نوں اپنی پوزیشن واضح کرن دا آکھیا اے۔ ایس حوالے نال ہور ایہ خبر اے کہ ایس درخاست اُتے جسٹس مظاہر علی نقوی دی سربراہی وچ تن رکنی فل بنچ نے سنوائی کیتی سی۔ تے اوہناں نے ای تحریری حکم جاری کیتا اے۔ چیتے رہوے کہ پچھلے مہینے سابق وزیر اعظم نواز شریف نے اک انگریزی اخبار نوں انٹرویو دیندے ہوئے آکھیا سی کہ پاکستان دے عسکریت پسنداں نے بھارت جا کے ممبئی اُتے حملا کیتا سی۔
