لندن( پاکستان پوائنٹ نیوز26۔جون2018ء ) پاکستان مسلم لیگ (ن) دے قائد محمد نواز شریف دے پُتر حسین نواز نے آکھیا اے کہ برطانوی اخبار وچ جیہڑی جائیداد دا ذکر اے اوہ ہن شریف خاندان دی ملکیت نہیں، لندن پراپرٹیز دا کاروبار حسن نواز نے کیتا سی، پر ہن اوہ پراپرٹیز حسین نواز دی وی ملکیت نہیں اے۔ میڈیا رپورٹس مطابق سابق وزیراعظم نواز شریف دے پُتر حسین نواز نے لندن وچ پرچاکاراں نال گل بات کردے ہوئے آکھیا کہ ڈاکٹر اج بیگم کلثوم نواز دا معائنہ کر کے ہور علاج دا فیصلا کرن گے۔
اوہناں نے دسیا کہ ڈاکٹراں نے کلثوم نواز نوں وینٹی لیٹر توں ہٹان دا فیصلا اجے نہیں کیتا۔ حسین نواز نے برطانوی اخبار دی رپورٹ نوں رد کردے ہوئے آکھیاکہ ایس توں پہلاں سابق وزیراعظم نواز شریف نے وی ذکر کیتی گئی جائیدا نوں رد کیتا سی۔ نواز شریف دا کہنا سی کہ جو لندن وچ جائیداد دا پروپیگنڈا کر رہے نیں اوہ کردے رہن ۔ چیتے رہوے کہ برطانوی اخبار دی رپورٹ وچ دسیا گیا اے کہ لندن وچ موجود 4فلیٹس شریف خاندان دی ملکیت نیں۔ سابق وزیراعظم نواز شریف 1993توں جدوں وی لندن آؤندے نیں تے ایہناں فلیٹاں وچ رہندے نیں، جیہناں دی مالیت گھٹو گھٹ 7ملین پاؤنڈ اے۔رپورٹ وچ شریف خاندان دے فلیٹاں دیاں تصویراں وی جاری کیتیاں گئیاں نیں تے نال اوہناں دی مالیت وی دسی گئی اے۔
