ملک صاحب تُسیں طاقتور او تہاڈے خلاف کوئی سر نہیں چُک سکدا: چیف جسٹس آف پاکستان

اسلام آباد( پاکستان پوائنٹ نیوز26۔جون2018ء ) سپریم کورٹ آف پاکستان وچ بحریہ ٹاؤن کیس دی سنوائی ہوئی۔ میڈیا رپورٹ مطابق بحریہ ٹاؤن دے چیئرمین ملک ریاض آپ سپریم کورٹ وچ پیش ہوئے۔ سنوائی دوران چیف جسٹس نے ملک ریاض نوں آکھیا کہ ملک صاحب تُسیں طاقتور او، تہاڈے خلاف کوئی سر نہیں چُک سکدا۔ جیہدے اُتے ملک ریاض نے آکھیا کہ اللہ دی قسم طاقتور صرف رب دی ذات اے، میں20بلین رُپئے سپریم کورٹ وچ جمع کروائے نیں۔

جسٹس ثاقب نثار نے آکھیا کہ دوبلین تے میں ماڑے لوکاں توں کڈھوائے نیں۔ چیف جسٹس نے آکھیا کہ دولت جمع کرنا چھڈو تے لوکاں دیاں امانتاں واپس کرو۔ ہن بحریہ ٹاؤن نے کوئی نواں منصوبہ نہیں بنانا، سارا کم بند کروا دیواں گا۔ ملک ریاض نے آکھیاکہ میں کلمہ پڑھ کے آکھ سکنا واں کہ مینوں پیسیاں دی لوڑ نہیں اے۔ جیہدے مگروں سپریم کورٹ نے ملک ریاض نوں 5ارب رُپئے سپریم کورٹ وچ جمع کروان دا حکم دے دتا۔

سپریم کورٹ نے حکم دیندے ہوئے آکھیا کہ ملک ریاض نوں ذاتی، بیوی تے بالاں دی جائیداد ویچن دی اجازت نہیں ہوئے گی۔ سپریم کورٹ نے ملک ریاض نوں کل تیکر جواب جمع کروان دی ہدایت کر دتی۔ چیف جسٹس دا کہنا سی کہ نظرثانی درخاستاں دی سنوائی 21جولائی نوں کراں گے۔ عدالت نے بحریہ ٹاؤن کراچی نوں پیسے لین توں وی ڈکدے ہوئے سنوائی 20جولائی تیکر ملتوی کر دتی۔ چیتے رہوے کہ 4مئی 2018نوں سپریم کورٹ نے بحریہ ٹاؤن نوں سرکاری زمین دی الاٹمنٹ تے تبادلے نوں غیر قانونی قرار دیند ے ہوئے بحریہ ٹاؤن کراچی نوں رہائشی، کمرشل پلاٹاں تے عمارتاں دی فروخت توں روک دتا سی۔