پنوں عاقل( پاکستان پوائنٹ نیوز26۔جون2018ء ) پاکستان پیپلز پارٹی دے رہنما خورشید شاہ نوں لوکائی نال خطاب کرنا مہنگا پے گیا۔ نوجوان نے خورشید شاہ توں خطاب دوران کئی سوال کیتے۔ تفصیل مطابق جیویں جیویں الیکشن دا ویلا نیڑے آ رہیا ، اوویں اوویں سیاسی رہنماواں نے وی الیکشن وچ جِت لئی اپنیاں کوششاں تیز کر دتیاں نیں۔ پنج سال حلقے دا مونہ نہ ویکھن والے سیاسی رہنماواں نے وی ہن اپنے حلقیاں وچ آنا جانا شروع کر دتا اے۔
پر لوک وی ہن سیانے ہو گئے نیں، اوہ اپنے سیاسی رہنماواں توں ایہ سوال کرن لگے گئے نیں کہ پنج سال ساڈا خیال نہیں آیا ہن ووٹ منگن کیوں آئے او؟اجیہا واقعہ پنوں عاقل وچ پیش آیا جتھے نوجوان نے خورشید شاہ دے خطاب دوران سوال کردے ہوئے آکھیا کہ تُسیں دس سال حکومت وچ رہے پر ساڈے علاقے وچ نہ پانی اے تے نہ ای کوئی سڑک بنی ہوئی اے۔ خورشید شاہ نے نوجوان دی گل دا جواب ہسدے ہوئے دتا تے آکھیا کہ ہن ایہ ویڈیو سوشل میڈیا اُتے پا دینا۔
کیونکہ ایس توں پہلاں کئی ایس طرحاں دے واقعات ساہمنے آئے نیں جدوں سیاسی رہنما اپنے حلقے وچ ووٹ منگن گیا تے اوہنوں ڈاڈھی شرمندگی دا ساہمنا کرنا پیا کیونکہ لوکاں نے اوہناں نوں گھیر کے پنج سال دی کارکردگی بارے سوال پُچھے۔ ایس توں پہلاں سابق وزیراعظم شاہد خاقان عباسی نوں وی کہوٹہ وچ لوکاں نے گھیر لیا سی تے پنج سال دی کارکردگی دا حساب منگیا ۔ جدکہ سکندر بوسن نوں وی ملتان وچ ایسے طرحاں دی صورتحال دا ساہمنا کرنا پیا۔
