کراچی( پاکستان پوائنٹ نیوز25۔جون2018ء ) مشہور ٹی وی اینکر و پی ٹی آئی رہنما عامر لیاقت حسین دے دوجے ویاہ دے انکشاف اُتے اوہناں دی پہلی بیوی ہسپتال منتقل ہوگئی۔ میڈیا رپورٹ مطابق ڈاکٹر عامر لیاقت حسین دی پہلی بیوی دے ہسپتال منتقل ہون دی خبر اوہناں دی دھی دعا نے مائیکرو بلاگنگ ویب سائٹ ٹویٹر اُتے اپنے اک پیغام راہیں دتی۔دعا دا کہنا سی کہ میری والدہ ایمرجنسی وچ نیں، اوہناں دی طبیعت ٹھیک نہیں اے، مہربانی کر کے اوہناں لئی دعاکرو۔
عامر لیاقت حسین دی بیوی بشری ایڈووکیٹ ہائی کورٹ نیں تے اوہ’ جیو‘ ٹی وی وچ پروڈیوسر دے فرض وی نبھا چکیا نیں، ایس توں وکھ اوہ پی ایچ ڈی کر رہیاں نیں۔اوہناں دے دو بال نیں جیہناں دے ناں دعا تے احمد عامر نیں۔ عامر لیاقت حسین ولوں پہلی بیوی بشری دی صحت دے حوالے نال کوئی وی پیغام جاری نہیں کیتا گیا پر پچھلے دیہاڑے اوہناں نے ٹویٹر اُتے اپنی دوجی مبینہ بیوی سیدہ طوبی انور نوں ٹویٹر راہیں سنیہا گھلیا سی کہ اوکڑاں توں نہ گھبراؤ، ستارے انھیریاں وچ چمکدے نیں، تے نال ای ہیش ٹیک وچ لکھیا کہ میں ہاراں گا نہیں۔چیتے رہوے کہ پچھلے کُجھ دناں توں عامر لیاقت حسین دے 24ورھیاں دی سیدہ طوبی انور نال دوجے ویاہ دیاں خبراں گھم رہیاں سن۔ نجی ٹی وی چینل دا کہنا سی کہ ڈاکٹر عامر لیاقت حسین نے کُجھ مہینے پہلاں ای طوبی انور نال مبینہ ویاہ کیتا پر اوہناں نے اپنے کاغذات نامزدگی وچ دوجے ویاہ دا ذکر نہیں کیتا۔
