اسلام آباد( پاکستان پوائنٹ نیوز25۔جون2018ء ) چیف جسٹس آف پاکستان میاں ثاقب نثار نے ڈاکٹر عافیہ صدیقی دا معاملا امریکی عدالت لیجان دا فیصلا کر لیا۔ چیف جسٹس دا کہنا سی کہ ڈاکٹر عافیہ صدیقی دی شہادت بارے خبراں ملیاں تے دل دُکھیا پر دفتر خارجا ولوں جاری بیان مگروں تسلی ہوگئی کہ اوہ زندہ نیں۔ چیف جسٹس نے آکھیا کہ اسیں ڈاکٹر عافیہ صدیقی دے معاملے اُتے جو کر سکدے آں، اوہ کراں گے۔
ڈاکٹر عافیہ صدیقی بارے اسیں امریکی عدالت نال رابطہ کر کے اوتھے مقدمہ دائر کراں گے، اسیں حکم جاری کر دتا،پر جے امریکی عدالت حکم چُک کے سُٹ دیندی تے ساڈی عدالت دی کیہ عزت ہوئے گی؟چیتے رہوے کہ امریکی جیل وچ قید ڈاکٹر عافیہ دی موت بارے خبراں آئیاں سن، جیہناں نوں اوہناں دے خاندان نے وی رد کیتا۔ بعدوں قومی اخبار وچ چھپن والی اک خبر مطابق ڈاکٹر عافیہ دصدیقی نے کئی ورھے پہلاں اپنے جیل دے حالات تے جیل وچ ہون والے سلوک بارے گل بات کیتی۔
امریکی ریاست ٹیکساس وچ موجود سوانیاں دی جیل فیڈرل میڈیکل سنٹر کارس ویل وچ قید دی سزا کٹن والی پاکستانی سوانی ڈاکٹر عافیہ صدیقی نال پاکستانی قونصل جنرل عائشہ فاروقی نے وی ملاقات کیتی۔ جیہدی تفصیل 24مئی نوں پاکستانی دفتر خارجا نوں گھلی گئی۔ قونصل جنرل مطابق ڈاکٹر عافیہ جیل سٹاف توں ڈریاں ہوئیاں نیں پر ایہدے مگروں وی آس وند(پرامید) وکھالی دیندیاں نیں۔
ڈاکٹر عافیہ صدیقی نے دسیا کہ میں ذہنی تے نفسیاتی طور اُتے بالکل ٹھیک آں۔ جیل حکام مینوں کھان لئی زہر دے رہے نیں، تے مینوں عملے ولوں ہراساں وی کیتا جا رہیا اے۔ اوہناں نے آکھیا کہ کیس سپروائزر اینی نیبلٹ نے میرا سکارف کھچیا تے دو ساتھیاں نال رلکے جنسی تشدد دی کوشش کیتی۔ جیل سٹاف ممبر رامی ریز نے میری چادر اُتے پیشاب کیتا۔ اوہناں دا کہنا سی کہ میرا کیس وکیل دی سستی پاروں ضائع ہویا اے، جیل وچ عبادت لئی کوئی تھاں نہیں اے۔
