اسلام آباد( پاکستان پوائنٹ نیوز21۔جون2018ء ) الیکشن کمیشن وچ کاغذات نامزدگی جمع کروان دا سلسلا پورا ہو گیا اے، جیہدے مگروں کاغذاں دی پُن چھان کیتی جا رہی اے۔ ہر امیدوار دانوں کاغذات نامزدگی نال اپنا بیان حلفی وی جمع کروان دا آکھیا گیا ۔شہباز شریف نے کاغذات وچ اپنیاں دوویں بیویاں نصرت بھٹو تے تہمینہ دورانی دے اثاثیاں دیاں تفصیلاں وی ظاہر کیتیاں نیں۔
میڈیا رپورٹس مطابق شہباز شریف دی گھر والی نصرت شہباز اپنے شوہر توں وی ودھ امیر نکلیاں نیں، جیہناں دے مجموعی اثاثیاں دی قیمت 22کروڑ 56لکھ اے۔شہباز شریف مطابق نصرت شہباز دے وکھو وکھ(مختلف) کمپنیاں وچ 67لکھ رُپئے مالیت دے شیئرز، 17لکھ رُپئے دی جیولری تے 5وکھو وکھ بنکاں وچ اکاؤنٹس نیں،جیہناں وچ اک کروڑ 89لکھ رُپئے دا بیلنس ظاہر کیتا۔ ایس توں وکھ سابق وزیر اعلا پنجاب شہباز شریف نے کاغذات نامزدگی وچ اپنے اثاثیاں دی مالیت 15کروڑ رُپئے ظاہر کیتی جدکہ بینک اکاؤنٹس وچ مجموعی طور اُتے اک کروڑ 14لکھ رُپئے ظاہر کیتے نیں۔
جمع کروائے گئے کاغذات نامزدگی دے مطابق شہباز شریف نے مری ہال روڈ اُتے اک کنال 9مرلے دے بنگلے دی قیمت 34ہزار رُپئے ظاہر کیتی۔ جدکہ ایس مقام اُتے اک بنگلا نمبر 54سی دی قیمت 27ہزار رُپئے ظاہر کیتی اے۔ سابق وزیر اعلا پنجاب نے شیخوپورا وچ 88کنال زمین والدہ ولوں تحفہ ظاہر کیتی اے جدکہ لاہور وچ 568کنال اُتے وکھ وکھ جائیداداں والدہ ولوں تحفہ ظاہر کیتیاں نیں۔
ایس توں وکھ (ن) لیگی رہنما شہباز شریف نے لندن وچ تن وکھ وکھ جائیداداں دی مجموعی قیمت 12کروڑ 61لکھ رُپئے ظاہر کیتی اے۔ دیبیہ انجنیئرنگ ملز، حمزہ سپننگ ملزم تے حدیبیہ ملز وچ شیئرز وی ظاہر کیتے۔ چیتے رہوے کہ ایس توں پہلاں وی کئی سیاسی رہنماواں دے اثاثیاں دیاں تفصیلاں ساہمنے آئیاں نیں۔2018دے الیکشن لئی جمع کروائے گئے کاغذات نامزدگی مطابق سابق وزیر اعظم نواز شریف دی مریم نواز وی کروڑاں دی مالک اے۔
