لاہور( پاکستان پوائنٹ نیوز20۔جون2018ء ) نیب نے پی ٹی آئی رہنما عبدالعلیم خان دا ناں ای سی ایل وچ پان لئی چیئرمین نیب نوں خط لکھ دتا۔ نیب نے پی ٹی آئی رہنما عبدالعلیم خان خلاف تحقیقات دا گھیرا کُھلا کرن دا فیصلا کر لیا۔ تفصیل مطابق پاکستان تحریک انصاف دے چیئرمین عمران خان دے نیڑلے دوست زلفی بخاری دا ناں ای سی ایل وچ ہونا چھ دن تیکر اک خبر بنیا رہیا۔
پر ہن پاکستان تحریک انصاف دے رہنما عبدالعلیم خان بارے وڈی خبر ساہمنے آ گئی اے۔ نیب نے پی ٹی آئی رہنما عبدالعلیم خان دا ناں ای سی ایل وچ پان دا فیصلا کر لیا اے۔ نیب نے عبدالعلیم خان دا ناں ای سی ایل وچ پان لئی چیئرمین نیب نوں وی خط لکھ دتا اے۔ نیب نے عبدالعلیم خان خلاف تحقیقات دے گھیرے نوں کُھلا کرن دا فیصلا کیتا اے۔ چیتے رہوے کہ علیم خان اُتے نیب وچ مقدمہ درج اے۔
نیب نے چیئرمین تحریک انصاف عمران خان دے قریبی تے سنٹرل پنجاب دے صدر عبدالعلیم خان نوں آف شور کمپنیاں بارے متضاد معلومات دین اُتے سدیا سی۔دوجے پاسے عبدالعلیم خان 2018دے الیکشن وچ پی ٹی آئی دے امیدوار وی نیں۔ جدکہ سابق سپیکر قومی اسمبلی و مسلم لیگ (ن) دے رہنما ایاز صادق نے این اے 129توں اپنے مخالف امیدوار علیم خان دے کاغذات نامزدگی اُتے اعتراض چُکے سن۔اوہناں دا کہنا سی علیم خان آف شور کمپنی دے مالک نیں تے اوہناں خلاف نیب وچ کیس سنوائی ہیٹھ نیں،ایس لئی اوہناں دے کاغذات نامزدگی رد کیتے جان۔
