سابق سپیکر قومی اسمبلی فہمیدہ مرزا دے کاغذات نامزدگی وی رد

کراچی( پاکستان پوائنٹ نیوز19۔جون2018ء ) سابق سپیکر قومی اسمبلی فہمیدہ مرزا دے کاغذات نامزدگی وی رد کر دتے گئے نیں۔ فہمیدہ مرزا نے گرینڈ ڈیمو کریٹک الائنس دے ٹکٹ اُتے کاغذات نامزدگی جمع کروائے سن۔ تفصیل مطابق سال 2018پاکستانی پارلیمانی سیاست وچ اک اہم تے تاریخی سال اے۔پاکستانی تاریخ وچ پہلی وار 2جمہوری حکومتاں اپنے اپنے آئینی دور پورے کر کے چلیاں گئیاں نیں۔

2018الیکشن دا سال اے۔ ملکی اداریاں نے الیکشن دی تیاری شروع کیتی ہوئی اے جدکہ الیکشن کمیشن وچ کاغذات نامزدگی جمع کروان دا سلسلا پورا ہو گیا اے، جیہدے مگروں کاغذاں دی پُن چھان کیتی جا رہی اے۔ ایس موقعے تے وڈیاں وڈیاں وکٹاں اُڈن دی امید اے، ایس حوالے نال آکھیا جا رہیا سی کہ بہت سارے وڈے وڈے سیاسی ناں ایس مرحلے اُتے مشکل وچ پھس سکدے نیں۔تازہ اطلاع مطابق سابق سپیکر قومی اسمبلی فہمیدہ مرزا دے کاغذات نامزدگی رد ہو گئے نیں۔ فہمیدہ مرزا نے گرینڈ ڈیموکریٹک الائنس دے ٹکٹ اُتے کاغذات نامزدگی جمع کروائے سن۔ الیکشن کمشنر سندھ دا کہنا سی کہ سوانیاں دی مخصوص سیٹ اُتے فہمیدہ مرزا دے کاغذات نامزدگی رد ہوئے نیں۔ اثاثیاں دی تفصیل نہ ہون اُتے کاغذات نامزدگی رد کیتے گئے۔