اسلام آباد( پاکستان پوائنٹ نیوز19۔جون2018ء ) عام انتخابات توں پہلاں مسلم لیگ (ن) دی گھٹدی ہوئی ساکھ نوں ویکھدے ہوئے ایہ آکھیا جا رہیا سی کہ عام انتخابات تیکر مسلم لیگ (ن) دے اہم رہنما پارٹی توں وکھ ہو جان گے پر مسلم لیگ (ن) نے خطرے نوں مُکھ رکھدے ہوئے پارٹی دے اہم رہنماواں نوں منان لئی وڈی گیم کھیڈی اے۔ (ن) لیگ نے ٹکٹاں دا لالچ دے کے اپنے سارے رُسے رہنماواں نوں منا لیا۔
میڈیا رپورٹ مطابق مسلم لیگ (ن) دی پارٹی اندر اختلافات ختم کرن دی نویں حکمت عملی کامیاب ہو گئی۔ قیادت نے اختلافات ختم نہ ہون دی صورت وچ حلقے اوپن رکھن دی دھمکی دتی سی، جیہدے مگروں راولپنڈی، فیصل آباد تے لودھراں وچ لیگی دھڑے اک ہو گئے۔ جہلم وچ وی مقامی قیادت نوں پیغام گھل دتا گیا ۔ نجی ٹی وی چینل دے وسیلیاں مطابق (ن) لیگ ولوں پارٹی اندر اختلافات ختم کرن دی نویں حکمت عملی کامیاب ہو گئی اے۔
مسلم لیگ (ن) نے اختلافات ختم نہ ہون دی صورت وچ حلقے اوپن رکھن دی دھمکی دتی سی۔ جیہدے مگروں راولپنڈی، فیصل آباد تے لودھراں وچ لیگی دھڑے اک ہو گئے۔ پارٹی قیادت نے راولپنڈی تے لودھراں دے دوویں دھڑیاں دے ٹکٹ صلح صفائی دی شرط اُتے دین دا آکھیا سی۔ چیتے رہوے کہ راولپنڈی وچ چودھری تنویر تے حنیف عباسی دھڑے وچ صلح مگروں حنیف عباسی تے دانیال تنویز نوں ٹکٹ ملن گے۔ایسے طرحاں فیصل آباد وچ وی رانا ثناء اللہ تے چودھری شیر علی گروپ وچکار اختلافات ختم ہو گئے نیں۔
