شہری نے کالا باغ ڈیم واسطے پیسے دین لئی پُتر نوں ویچن دا اعلان کر دتا

شہری نے کالا باغ ڈیم واسطے پیسے دین لئی پُتر نوں ویچن دا اعلان کر دتا

ملتان( پاکستان پوائنٹ نیوز14۔جون2018ء ) شہری نے کالا باغ ڈیم دی اُساری لئی پیسے عطیہ کرن واسطے پُتر نوں ویچن دا اعلان کر دتا۔ تفصیل مطابق پاکستان وچ نویں ڈیماں دی ضرورت پہلاں توں کیتے بُہتی ودھ گئی اے۔ پاکستان وچ پانی دی کمی دا بحران تیزی نال ودھدا جارہیا اے۔ جتھے اک پاسے موسمیاتی تبدیلیاں دی وجہ پاکستان بے حد متاثرہویا اے، اوتھے دوجے پاسے بھارت نے نویں ڈیم بنا کے پاکستان دے دریاواں دا پانی روک لیا اے۔

ایس ساری صورتحال مگروں پاکستان وچ بنن والی کوئی وی حکومت ایس مسئلے نوں حل کرن لئی سنجیدہ وکھالی نہیں دیندی۔ پاکستان وچ بنن والیاں زیادہ حکومتاں دی توجہ ترقیاتی منصوبے اُتے رہندی اے۔ حکومتاں نے کدی وی کل (مستقبل)دی فکر کردے ہوئے پانی دے مسئلے دے حل لئی سنجیدگی نال کوئی کم نہیں کیتا۔ ایہو وجہ اے کہ پاکستان وچ پانی دا بحران ہر لنگھدے ویلے نال ودھدا جا رہیا اے۔

عالمی ماحولیاتی تنظیماں دی رپورٹ وچ دسیا گیا اے کہ پاکستان موسمیاتی تبدیلیاں کارن سبھ توں ودھ متاثر ہون والے ملکاں وچ شامل اے۔ ایسے کر کے پاکستان وچ پہلے توں کیتے گھٹ بارشاں ہون لگیاں نیں۔ جدکہ پاکستان وچ گرمی دے موسم دی شدت تے دورانیہ وی ودھدا جا رہیا اے۔ ایہناں خبراں مگروں سوشل میڈیا اُتے ڈیم بنان دی آواز چُکی گئی، جیہنوں لوکائی ولوں پسند کیتا گیا۔

ایس حوالے نال لوکائی ولوں کالا باغ ڈیم دی اُساری لئی عطیات دین دا وی اعلان کیتا گیا۔ تازہ اطلاع مطابق ملتان توں تعلق رکھن والے اک شہری نے کالا باغ ڈیم دی اُساری لئی پیسے اکٹھے کرن واسطے اپنے 10ورھیاں دے پُتر نوں ویچن دا اعلان کر دتا۔ پُتر نوں ویچن والے شہری اقبال دا کہنا سی کہ کالا باغ ڈیم دا معاملا 22ورھیاں توں لٹکیا ہویا اے۔جیہدا نقصان آن والیاں نسلاں نوں بھگتنا پئے گا۔ میں اپنے پُتر نوں ایس لئی ویچ رہیا واں کہ آن والیاں نسلاں نوں ایہناں مشکلاں توں بچا سکاں۔