جھنگ( پاکستان پوائنٹ نیوز14۔جون2018ء ) پاکستان مسلم لیگ (ن) نوں جھنگ توں الیکشن لڑن لئی کسے امیدوار دی درخاست نہیں ملی، جیہدی وجہ توں (ن) لیگ ڈاڈھی پریشان اے۔ قومی اخبار دی اک رپورٹ مطابق سابق وفاقی وزیر و امریکا وچ پاکستان دی سابق سفیر سیدہ عابدہ حسین دی مسلم لیگ (ن) وچ رلت دا امکان اے۔ وسیلیاں مطابق 25جولائی نوں ہون والے الیکشن لئی (ن) لیگ جتھے کئی اہم رہنماواں دے ساتھ چھڈن نال اوکڑاں دا شکار سی۔
اوتھے جھنگ توں کسے وی رہنما ولوں ٹکٹ لین لئی درخاست نہ ملن اُتے پریشان اے۔ (ن) لیگ دی قیادت نے بے وفائی کرن والے سابق ارکان اسمبلی دا ڈٹ کے مقابلا کرن تے جھنگ دا میدان خالی نہ چھڈن دا فیصلا کردے ہوئے اپنی منصوبہ بندی بنا لی اے۔ وسیلیاں مطابق (ن) لیگ دی قیادت نے سابق وزیر و امریکا وچ پاکستان دی سابق سفیر سیدہ عابدہ حسین نال رابطہ کر کے مذاکرات شروع کر دتے نیں۔
مذاکرات کامیاب ہون دی صورت وچ سیدہ عابدہ حسین (ن) لیگ وچ رلتی ہو سکدیاں نیں۔ تے ممکنہ طور اُتے این اے 115تو ں( ن) لیگ دیاں امیدوار ہون گیاں۔ چیتے رہوے کہ جھنگ وچ قومی اسمبلی دیاں تن تے صوبائی اسمبلی دیاں ست سیٹاں نیں۔ دلچسپ گل ایہ اے کہ (ن) لیگ دے ضلعی صدر و سابق ایم پی اے خالد غنی سابق وفاقی وزیر شیخ وقاص اکرم سنے ہور سابق ارکان اسمبلی اپنی جماعت دے ٹکٹ دی بجائے آزاد حیثیت نال الیکشن لڑ رہے نیں۔
