نگران حکومت دے غیر سیاسی ہون دا راز کُھل گیا

اسلام آباد( پاکستان پوائنٹ نیوز13۔جون2018ء ) نگران حکومت دے غیر سیاسی ہون دا راز کُھل گیا۔ نگران وزیر داخلا اعظم خان عمران خان فاؤنڈیشن دے بورڈ ممبر نکلے، عمران خان فاؤنڈیشن دی ویب سائٹ اُتے وی اعظم خان دا ناں بطور بورڈ ممبر موجود اے۔ تفصیل مطابق مسلم لیگ (ن) دی سیاسی حکومت اپنے پنج سال پورے کرن مگروں 31مئی نوں چلی گئی ،حکومت جاندے ای نگران سیٹ اپ نے انتخابات دے انعقاد دی ذمے واری سنبھالی۔

نگران سیٹ اپ لئی جدوں جسٹس ناصر الملک دا ناں بطور نگران وزیر اعظم چُنیا گیا تے ساریاں جماعتاں نے ایس غیر سیاسی تے غیر متنازعہ ناں نوں جی آیاں آکھیا۔ نگران وزیراعظم جسٹس(ر) ناصر الملک نے نگران وزیراعظم بندے ای اعلان کیتا کہ نگران کابینہ غیر سیاسی ہوئے گی۔ پر چالو صورتحال مطابق نگران حکومت دے غیر سیاسی ہون دا راز کُھل گیا۔ نگران کابینہ دے اہم ترین ممبر دا عمران خان نال قریبی تعلق ہون دا انکشاف ہویا اے۔

نگران وزیر داخلا اعظم خان عمران خان فاؤنڈیشن دے بورڈ ممبر نکلے۔ عمران خان فاؤندیشن دی ویب سائٹ اُتے وی اعظم خان دا ناں بطور بورڈ ممبر موجود اے۔ اعظم خان نے 2010-11وچ لاہور وچ بورڈ آف ڈائریکٹر دی میٹنگ اندروی رلت کیتی۔ ایس بارے گل بات کردے ہوئے نگران وزیر داخلا دا کہنا سی کہ عمران خان نے امدادی کارروائیاں دی مہارت اُتے مینوں فاؤنڈیشن وچ رلت دی دعوت دتی سی۔ عمران خان فاؤنڈیشن وچ رضاکارانہ طور اُتے دُکھی لوکاں دی خدمت کیتی جدکہ 2011مگروں عمران خان فاؤنڈیشن دے بورڈ آف ڈائریکٹر دی کسے میٹنگ وچ رلت نہیں کیتی۔ اوہناں دا ہور کہنا سی کہ ایس توں وکھ وی ہور خیراتی اداریاں وچ وی دُکھی انسانیت لئی کم کر چکیا واں۔