اسلام آباد( پاکستان پوائنٹ نیوز13۔جون2018ء ) عمران خان اپنی گھر والی بشری بی بی نال جہاز اُتے عمرہ کرن سعودی عرب گئے سن۔ عمران خان نوں پرائیویٹ جہازراہیں عمرے اُتے جان دی وجہ توں ڈاڈھی تنقید دا ساہمنا کرنا پیا۔ لوکاں دا کہنا سی کہ عمران خان اجے وزیراعظم بنے نہیں پر اوہناں دے اصول ہنے ای بدل گئے نیں۔عمران خان تے وی آئی پی پروٹوکول خلاف سن پر ہن اوہ آپ شاہی انداز نال سعودی عرب گئے نیں۔
ایس بارے گل بات کردے ہوئے پاکستان مسلم لیگ (ن) دے رہنما نہال ہاشمی دا کہنا سی کہ عمران خان اک چارٹر جہاز راہیں سعودی عرب گئے پر کوئی عمران خان نوں دس دیندا کہ جتھے عمرے دی نیت کر لئے اوتھے ای احرام بنھ لیا جاندا۔ پر عمران خان جدوں مدینہ اُترے تے اوہناں نے احرام نہیں بنھیا ہویا سی۔ پروگرام وچ موجود اینکر عمران خان دا نہاشمی نوں جواب دیندے ہوئے کہنا سی کہ عمران خان سعودی عرب وچ مدینہ گئے تے ایہہ باقاعدہ اک پوائنٹ اے۔
اوتھوں لوک احرام بنھ کے مکہ جاندے نیں۔ پر نہال ہاشمی نے اک نہ سنی تے فیراوہو گل آکھن لگے۔ جیہدا جواب دیندے ہوئے اینکر دا کہنا سی کہ جو لوک جدہ جاندے نیں اوہ احرام بنھدے نیں پر جو لوک ڈائریکٹ مدینے جاندے اوہناں لئی احرام بھننا ضروری نہیں ہوندا۔
