عمران خان دے سعودی عرب جان وچ کِنا پیسہ خرچ ہویا؟تفصیلاں ساہمنے آ گئیاں

عمران خان دے سعودی عرب جان وچ کِنا پیسہ خرچ ہویا؟تفصیلاں ساہمنے آ گئیاں

اسلام آباد( پاکستان پوائنٹ نیوز13۔جون2018ء ) عمران خان نوں سعودی عرب لیجان والے جہاز بارے پریشان کر دین والیاں تفصیلاں ساہمنے آگئیاں۔ تفصیل مطابق پاکستان تحریک انصاف دے سربراہ عمران خان نجی کمپنی دا جیٹ جہاز لے کے عمرہ کرن سعودی عرب گئے سن۔ ایس جہاز وچ اک گھنٹہ سفر کرن دا کرایہ 8لکھ رُپئے اے۔ عمران خان سعودی عرب جان لئی نجی فضائی کمپنی دے جیٹ جہاز 604اُتے سوار ہو کے گئے، ایس جہاز وچ دس سیٹاں ہوندیاں نیں، حجاز مقدس لئی عمران خان دے سفر دی شروعات اسلام آباد توں ہوئی سی۔

جہاز پہلے اسلام آباد توں لاہور گیا، جتھوں عمران خان دے گھر والیاں نوں لے کے واپس اسلام آباد آیا۔ عمران خان گھر والیاں تے اپنے ساتھیاں نال اسلام آباد توں مدینہ لئی ٹُرے سن۔ شیڈول مطابق ایہ چارٹر جہاز مدینے توں جدہ گیا سی۔ عمرہ کرن مگروں عمران خان تے اوہناں دے ساتھیاں نوں لے کے جہاز بدھ نوں جدہ توں اسلام آباد اپڑیا۔ شہری ہوا بازی دے وسیلیاں مطابق چارٹر جیٹ جہاز دی اک گھنٹہ اُڈان دا کرایہ جیہدے وچ تیل تے ہور خرچے وی شامل ہوندے نیں،8لکھ رُپئے ہوندا اے۔

عمران خان دے فضائی سفر دا مجموعی دورانیہ تقریبن 13گھنٹے تے خرچیاں دا اندازہ اک کروڑ رُپئے توں ودھ اے۔چیتے رہوے کہ عمران خان اپنی گھر والی بشری بی بی نال جہاز اُتے عمرہ کرن سعودی عرب گئے سن۔ عمران خان نوں پرائیویٹ جہازراہیں عمرے اُتے جان دی وجہ توں ڈاڈھی تنقید دا ساہمنا کرنا پیا۔ لوکاں دا کہنا سی کہ عمران خان اجے وزیراعظم بنے نہیں پر اوہناں دے اصول ہنے ای بدل گئے نیں۔