سعودی عرب( پاکستان پوائنٹ نیوز12۔جون2018ء ) رمضان دی 27ویں رات امام کعبہ نے پاکستان دے حق وچ دعا کیتی۔ تفصیل مطابق ملک بھر وچ رمضان دی 27ویں رات بہت عقیدت و احترام نال منائی گئی۔ مسلماناں نے رات بھر تلاوت قرآن مجید، نفل تے ذکر و اذکار وچ لنگھائی تے سحری تیکر عبادت و ریاضت کردے رہے۔ شہر بھر دیاں مسجداں نوں بتیاں نال سجایا گیا سی۔ رمضان المبارک دی 27ویں رات اک خاص اہمیت رکھدی اے۔
دنیا وچ رہن والے سارے مسلمان 27ویں رات خاص عبادت دا اہتمام کردے نیں۔ ایہ رات اپنے پروردگار دی رضا تے اوہدا قرب حاصل کرن دا وسیلا اے۔ایس رات ملک دی سلامتی و استحکام، امت مسلمہ دی اُچیائی تے ملکوں دہشت گردی دے خاتمے لئی خصوصی دعاواں کیتیاں گئیاں۔ ایس توں وکھ علماء نے شب قدر دے فضائل بیان کیتے۔ایس رات شبینہ محفلاں و جشن نزول قرآن، صلوة التسبیح تے اللہ تعالی دے حضور گناہواں توں توبہ، جنت دی منگ، رزق وچ برکت تے پاکستان دی سلامتی لئی خاص دعاواں کیتیاں گئیاں۔
رمضان دی 27ویں رات امام کعبہ نے پاکستان دے حق وچ دعاواں کیتیاں۔ دعا کردے ہوئے امام کعبہ دا کہنا سی کہ رب پاکستان اُتے اپنا خاص رحم کرے۔ اوہناں دعا کردے ہوئے آکھیا کہ رب مسلماناں نوں اللہ تے اوہدے رسول دے دسے گئے اصولاں مطابق زندگی لنگھان دی توفیق دیوے۔
