اسلام آباد( پاکستان پوائنٹ نیوز12۔جون2018ء ) نواں چن جمعرات 14جون 2018دی شام وکھالی دین دا امکان نہ ہون دے برابر اے، ایس لئی روزے 30ہون مگروں عید 16جون نوں ہوئے گی۔ سیکرٹری جنرل رویت ہلال ریسرچ کونسل خالد اعجاز مفتی ولوں جاری بیان وچ آکھیا گیا کہ نواں چن جمعرات 14جون 2018دی شام وکھالی دین دا امکان تقریبن نہ ہون دے برابر ای اے، ایس لئی عید 16جون نوں ہوئے گی۔
بیان وچ آکھیا گیا کہ نواں چن اوس ویلے تیکر وکھالی نہیں دیندا جدوں تیکر اوہدی عمر سورج ڈُبن ویلے گھٹو گھٹ 19گھنٹے توں ودھ تے سورج ڈُبن اتے چن نکلن دا درمیانی فرق گھٹو گھٹ 40منٹ توں ودھ نہ ہو جائے۔ نواں چن 13تے14جون دی وچکارلی رات پاکستان دے معیاری ویلے مطابق 12وجکے 43منٹ اُتے پیدا ہوئے گا۔ نویں چن دی عمر 14جون نوں سورج ڈُبن ویلے پاکستان دے کسے وی شہر وچ 19گھنٹے توں ودھ نہیں ہوئے گی۔ایس لئی 30روزے پورے ہون گے ۔ چیتے رہوے کہ ایس توں پہلاں محکمہ موسمیات نے وی شوال دا چن جمعرات نوں نظر آن دے حوالے نال آکھیا سی کہ سائنسی لحاظ نال 29ویں روزے نوں چن نظر آن دا امکان گھٹ اے۔ایس حوالے نال محکمہ موسمیات ولوں وزارت مذہبی امور نوں تفصیلاں وی گھلیاں گئیاں سن۔
