اسلام آباد( پاکستان پوائنٹ نیوز11۔جون2018ء ) وفاقی حکومت نے عید دے موقعے تے لوڈشیڈنگ نہ کرن دا اعلان کر دتا اے، وزات توانائی نے بجلی دیاں ونڈ کار(تقسیم کار) کمپنیاں نوں 14جون توں 18جون تیکر بجلی دی لوڈشیڈنگ نہ کرن دا آکھیا اے۔ میڈیا رپورٹس مطابق نگران وزیراعظم جسٹس (ر) ناصر الملک نے نکی عید دے موقعے تے (14توں18جون) بجلی دی لوڈشیڈنگ نہ کرن دی ہدایت کیتی اے۔
جیہدے مگروں وزارت توانائی نے بجلی دیاں ونڈ کار کمپنیاں نوں ہدایتاں جاری کیتیاں کہ بجلی دی پیداوار لئی کمپنیاں وادھو ایندھن جمع کرن ۔ چیتے رہوے کہ مسلم لیگ (ن) دی حکومت نے دعوا کیتا اے کہ اسیں نیشنل گریڈ وچ ساڈھے 10ہزار میگا واٹ بجلی شامل کیتی جدکہ سابق وزیر اعلا پنجاب شہباز شریف نے آکھیا کہ ہن ساڈی حکومت جا رہی اے جے ساڈے جان مگروں بجلی دی لوڈشیڈنگ ہوئی تے ساڈی ذمے واری نہیں اے۔
دوجے پاسے نگران وزیر اعظم نے نکی عید دے موقعے اُتے ملک بھر وچ سکیورٹی صورتحال نوں تسلی بخش بنان دی وی ہدایت کیتی۔ نگران وزیر اعظم نے وزارت داخلا نوں ہدایت کیتی اے کہ نکی عید دے وفاق دے نال نال صوبائی حکومتاں وی اپنے علاقیاں وچ نکی عید دی نماز دوران مسجداں تے عید دے اجتماعواں دے موقعے اُتے سکیورٹی صورتحال کنٹرول وچ رکھن۔
