لاہور( پاکستان پوائنٹ نیوز09۔جون2018ء ) تحریک انصاف نے چیف الیکشن کمشنر دے بھرا وقار نبی نوں ٹکٹ دے کے شفاف تے غیر جانبدار االیکشن اُتے سوالیہ نشان لا دتا اے، تحریک انصاف نے خیبرپختونخوا وچ این اے 37توں سردار وقار نبی نوں ٹکٹ جاری کر دتا اے، جیہدے اُتے سیاسی جماعتاں نے تشویش دا وکھالا کیتا اے۔ میڈیا رپورٹس مطابق تحریک انصاف نے الیکشن توں پہلاں ای دھاندلی دی نینہ رکھنا شروع کر دتی اے۔
پی ٹی آئی قیادت نے چیف الیکشن کمشنر سردار محمد رضا خان دے بھرا سردار وقار نبی نوں ٹکٹ جاری کر دتا اے۔ سردار وقار نبی نوں این اے 37توں ٹکٹ جاری کیتا گیا اے۔ چیف الیکشن کمشنر دے بھرا نال تحریک انصاف دا ایناڈونگھا تعلق ویکھ کے سیاسی جماعتاں ولوں تشویش دا وکھالا کیتا گیا اے۔ سیاسی جماعتاں نے چیف الیکشن کمشنر سردار رضا خان توں ایکشن لین دا مطالبہ کیتا اے۔
اوہناں نے آکھیاکہ پی ٹی آئی دی چیف الیکشن کمشنر دے بھرا وقار نوں نوازن نال الیکشن دا عمل کھرا تے منصفانہ نہیں ہو سکدا۔ ایہدے نال الیکشن کمشنر دی ساکھ نوں نقصان اپڑے گا۔ دوجے پاسے تحریک انصاف ولوں پارٹی امیدواراں نوں ٹکٹاں ونڈن دا سلسلا جاری اے۔ پر کئی پارٹی رہنما ایس طرحاں دے وی نیں جو دوجیاں جماعتاں توں رلتی ہوئے تے ہن الیکشن لڑن لئی اوہناں نوں ٹکٹاں نہیں دتیاں گئیاں۔
ایس طرحاں دے کارکناں وچ پی ٹی آئی دے اپنے وی پارٹی کارکن شامل نیں۔ وسیلیاں دا کہنا اے کہ تحریک انصاف دے پارلیمانی بورڈز نے سینئر قانون دان بابر اعوان نوں وی ٹکٹ دین توں معذرت کیتی اے۔ بابر اعوان سابق وزیر قانون تے پیپلز پارٹی توں تحریک انصا ف وچ رلتی ہوئے سن۔ بابر اعوان پاناما لیکس سنے پی ٹی آئی دی لیگل کمیٹی دے ممبر وی نیں۔ عمران خان کئی کیساں بارے بابر اعوان نال صلاح کردے نیں۔
ایس توں وکھ پی ٹی آئی نے اپنی انتخابی لسٹ وچ ویکھن نوں اپنے اہم رہنماواں علی محمد خان، شوکت یوسفزئی تے شہریار آفریدی نوں وی ٹکٹ جاری نہیں کیتا۔ فردوس عاشق اعوان، بابر اعوان ، فیصل واڈا، ڈاکٹر عامر لیاقت، سیف اللہ نیازی تے ولید اقبال نوں وی ٹکٹ نہیں دتا گیا۔ پی ٹی آئی دے ناراض کارکناں نے گرینڈ الائنس دے ناں توں اک اتحاد بنایا لیا اے، جیہدے وچ مردان توں تعلق رکھن والے کارکن وی شامل نیں، ایس گرینڈ الائنس دے ناراض کارکن پی ٹی آئی چیئرمین عمران خان دے گھر بنی گالا باہر احتجاج کرن گے۔
