اسلام آباد وچ میٹرو تے چل گئی پر بارشاں رُک گئیاں

مشہور پرچا کار نے میٹرو بس کیس نبیڑن اُتے چیف جسٹس توں سینیٹر مشاہد حسین نوں فیر سمن جاری کرن دا مطالبہ کر دتا

اسلام آباد وچ میٹرو تے چل گئی پر بارشاں رُک گئیاں
مشہور پرچا کار نے میٹرو بس کیس نبیڑن اُتے چیف جسٹس توں سینیٹر مشاہد حسین نوں فیر سمن جاری کرن دا مطالبہ کر دتا

لاہور( پاکستان پوائنٹ نیوز08۔جون2018ء ) پچھلے دیہاڑے سپریم کورٹ وچ میڑو بس سروس بارے آپ نوٹس کیس دی سنوائی ہوئی سی۔ سنوائی دوران درخاست گزار مشاہد اللہ حسین تے شاکر اللہ عدالت وچ پیش ہوئے۔ سنوائی دوران چیف جسٹس نے مشاہد حسین سید توں سوال کیتا کہ تُسیں میٹرو بس اُتے کرپشن دا الزام لایا سی۔ کیہ اج وی تُسیں کرپشن دے الزام اُتے قائم او؟جیہدے اُتے مشاہد حسین سید نے جواب دتا کہ میرا مسئلا ماحولیات بارے سی ،میں سی ڈی اے دے ماسٹر پلان بارے سوال چُکے سن، ہن کیونکہ میٹرو بس بن گئی اے ایس لئی، ایس کیس نوں نبیڑنا بہتر اے۔

جیہدے مگروں عدالت نے میٹرو بس کیس نبیڑ دتا سی۔ ایس بارے گل بات کرد ے ہوئے رؤف کلاسرا دا کہنا سی کہ سینیٹر مشاہد حسین سید نے چار ورھے پہلاں عدالت نوں خط لکھیا سی جدوں اسلام آباد وچ میٹرو بس بن رہی سی ۔ ایس خط وچ لکھیا گیا سی کہ میٹرو بس منصوبے دی وجہ توں اسلام آباد وچ رُکھ وڈھے جا رہے نیں، تن ہزار دے نیٹرے رُکھ وڈھے گئے۔ ایس لئی تُسیں سی ڈی اے والیاں نوں آکھو کہ اوہ کوئی ایسا روٹ لبھن جیہدے وچ رُکھ نہ وڈھے جان۔

ہن مشاہد حسین سید آکھدے نیں کہ میں کرپشن دی تے کوئی گل ای نہیں کیتی سی میں تے ماحولیات دی گل کیتی سی۔ چیف جسٹس نے وی مشاہد حسین نوں آسانی نال جان دتا۔ اوہناں نوں اینا آسانی نال نہیں جان دینا چاہیدا سی۔ رؤف کلاسرا دا کہنا سی کہ ہن وڈیاں ماحولیاتی تبدیلیاں آ رہیاں نیں۔ اسیں سوچ وی نہیں سکدے ساں کہ اسلام آباد وچ اینی گرم ہوئے گی۔ ہن اسلام آباد دا درجہ حرارت 41سینٹی گریڈ تیکر اپڑ گیا اے۔

پہلے تے انج ہوندا سی کہ ایتھے دن ویلے گرمی تے رات نوں مینہ پے جاندا سی۔ رؤف کلاسر دا کہنا سی کہ مشاہد حسین سید دی قیمت صرف اک سینیٹر شپ سی۔ اوہناں نے پارٹی بدل لی اے۔ مشاہد حسین نے 2014وچ اک تقریر کیتی سی۔ تقریر دوران اوہناں نے آکھیا سی کہ میڑو بس منصوبے وچ وڈی پدھر (سطح )اُتے کرپشن ہو رہی اے۔ایس منصوبے توں کوئی پیسہ بنا رہیا اے۔ پر مشاہد حسین نے ہن پیسہ بنان والیاں دی پارٹی جوائن کر لی۔ایس لئی میرا چیف جسٹس توں مطالبہ اے کہ اوہ فیر مشاہد حسین نوں سمن جاری کرن۔