اسلام آباد( پاکستان پوائنٹ نیوز08۔جون2018ء ) پچھلے دیہاڑے وفاق ولوں سرکاری ملازماں لئی عید دیاں چھٹیاں دا اعلان کیتا گیا سی۔ پر عید دیاں چھٹیاں بارے وفاق دے مبہم نوٹی فکیشن نے سرکاری ملازماں نوں چکراں وچ پا دتا اے۔ وفاق ولوں جاری نوٹی فکیشن وچ تاریخ دے حساب نال عید دیاں چھٹیاں چار بندیاں نیں پر نوٹی فکیشن وچ ہفتہ وار دناں دے حساب نال 5چھٹیاں لکھ دتیاں گئیاں نیں۔
وفاق ولوں جاری کیتے گئے مبہم نوٹی فکیشن نے لوکائی نوں چکراں وچ پا دتا اے۔ سرکاری ملازماں دا کہنا اے کہ وفاق ولوں نکی عید دیاں چھٹیاں دا اعلان تے کر دتا گیا اے۔ پر جاری نوٹی فکیشن وچ اجے تیکر ایہ ابہام اے کہ چھٹیاں چار نیں یاں پنج۔چیتے رہوے کہ پچھلے دیہاڑے وفاقی وزارت داخلا نے نکی عید دیاں چھٹیاں دی سمری تیار کیتی۔سمری وچ نکی عید دیاں چھٹیاں 14جون توں 18جون تیکر ہون دا اعلان کیتا گیا جیہدا بعدوں نوٹی فکیشن جاری کر دتا گیا۔
