لاہور( پاکستان پوائنٹ نیوز07۔جون2018ء ) میٹرو بس کیس وچ درخاست گزار نے چیف جسٹس ثاقب نثار اُتے ای رشوت لین دا الزام لا دتا۔ درخاست گزار ولوں الزام لان اُتے چیف جسٹس ولوں خفگی دا اظہار، چیف جسٹس دا کہنا سی کہ تہاڈا دماغ ٹھیک نہیں، تہاڈا معائنہ ہونا چاہیدا۔ میڈیا رپورٹس مطابق سپریم کورٹ وچ میٹرو بس سروس بارے آپ نوٹس کیس دی سنوائی ہوئی۔ سنوائی دوران درخاست گزار مشاہد اللہ حسین، شاکر اللہ تے ہور لوک عدالت وچ پیش ہوئے۔
سنوائی دوران چیف جسٹس نے مشاہد اللہ حسین توں سوال کیتا سی کہ تُسیں میٹرو بس اُتے کرپشن دا الزام لایا سی۔ کیہ اج وی تُسیں کرپشن دے الزام اُتے قائم او؟جیہدے اُتے مشاہداللہ حسین نے جواب دتا کہ میرا مسئلا ماحولیات بارے سی ، میں سی ڈی اے دے ماسٹر پلان بارے سوال چُکے سن، ہن کیونکہ میٹرو بس بن گئی اے ایس لئی ایس کیس نوں نبیڑنا بہتر اے۔جیہدے مگروں سپریم کورٹ نے اسلام آباد میٹرو بس سروس آپ نوٹس کیس نبیڑ دتا۔
آپ نوٹس کیس نبیڑن اُتے درخاست گزار شاکر اللہ نے عدالت وچ چیف جسٹس ثاقب میاں ثاقب نثار اُتے رشوت لین دا الزام لاندے آکھیاکہ تُسیں میرے کولوں رشوت منگی سی جو میں نہیں دتی۔ درخاست گزار شاکر اللہ دی الزام تراشی اُتے چیف جسٹس برہم ہوگئے۔ چیف جسٹس ثاقب نثار نے ریمارکس دیند ے ہوئے آکھیا کہ اے جسٹس عظمت سعید نے ٹھیک آکھیا سی تہاڈا دماغ ٹھیک نہیں اے۔ تہاڈا معائنہ ہونا چاہیدا۔ جیہدے جواب وچ شاکر اللہ نے چیف جسٹس ثاقب نثار نوں آکھیا کہ تسیں میڈیکل بورڈ بنا دیو ،دوویں اکٹھے چل کے معائنہ کروانے آں، جیہدے اُتے شاکر اللہ نوں عدالتی کمرے توں باہر کڈھ دتا گیا۔
