اسلام آباد( پاکستان پوائنٹ نیوز07۔جون2018ء ) سپریم کورٹ وچ اسلام آباد اندر پانی دی کمی اُتے چیف جسٹس دے آپ نوٹس کیس دی سنوائی ہوئی۔ چیف جسٹس آف پاکستان دا کہنا سی کہ ووٹ دی عزت دا مطلب لوکائی نوں بنیادی حق دینا اے۔ صاف پانی تے صاف ہوا دا ہونا ضروری اے۔ چیف جسٹس نے آکھیا کہ کالا باغ ڈیم اُتے لا اینڈ جسٹس کمیشن اک سیمینار کروائے گا۔ چیف جسٹس آف پاکستان میاں ثاقب نثار نے کالا باغ ڈیم دی اُساری بارے درخاست دی سنوائی دوران سابق حکومتاں ولوں پانی دے خطرناک مسئلے نوں نظر انداز کرن اُتے خفگی دا اظہار کیتا۔
چیف جسٹس آف پاکستان میاں ثاقب نثار دی سربراہی وچ سپریم کورٹ دے فاضل بنچ نے کالا باغ ڈیم بارے درخاست دی سنوائی کیتی۔ اوہناں نے آکھیا کہ اسیں کالا باغ ڈیم اُتے بحث کراواں گے۔ ایس معاملے نوں جذبات نال نہیں بلکہ حوصلے نال ویکھاں گے۔ چیف جسٹس نے آکھیا کہ پانی ای زندگی دی بقا اے۔ کالا باغ ڈیم اُتے صوبیاں نوں لڑوانا نہیں چاہندے۔ ایڈیشنل اٹارنی جنرل نے آکھیا کہ دارالحکومت نوں 50.7ملین گیلن پانی سپلائی کیتا جا رہیا اے۔
پانی دی طلب 120ملین گیلن توں وی ودھ اے۔ اوہناں نے دسیا کہ پینڈو علاقیاں وچ پانی سپلائی نہیں کیتا جارہیا۔ چیف جسٹس نے آکھیا کہ اسلام آباد وچ وی کراچی مگروں ٹینکرز وکن لگ گئے نیں۔ دارالحکومت وچ 1500رُپئے دا ٹینکر وکدا اے۔ ناقص پالیسیاں دی وجہ توں سملی ڈیم وچ پانی نہیں جا رہیا۔ درخت لان دا کم وی صرف کاغذاں وچ ای اے۔ چیف جسٹس میاں ثاقب نثار نے آکھیا کہ پانی دا مسئلا واٹر بم بندا جا رہیا اے۔
پانی جمع کرن دی گنجائش وچ وادھا نہیں کیتا گیا۔ روز بِہ کے حکومت دا آڈٹ نہیں کر سکدے۔ مون سون بارشاں دا پانی ضائع ہو جاندا اے، شہبازشریف نے منیا کہ 4ارب رُپئے لا کے وی اک قطرہ پانی نہیں کڈھیا، آن والے دناں وچ قوم لئی عذاب بن جائے گا۔ آصف زرداری تے نواز شریف دسن اوہناں نے اپنے اپنے دور وچ کیہ کیتا۔
