اسلام آباد( پاکستان پوائنٹ نیوز06۔جون2018ء ) ریحام خان نے عمران خان اُتے اک ہور خطرناک الزام لا دتا۔ ریحام خان دا کہنا اے کہ عمران خان اسلامی ووٹ بنک نوں اقتدار وچ آن لئی استعمال کر رہے نیں۔ پاکستان تحریک انصاف دے سربراہ عمران خان دی سابقہ دوجی بیوی ریحام خان دا کہناسی کہ عمران خان دے نظریات ہن تیکر غیر واضح نیں، پاکستان ایٹمی ملک اے تے اجیہے بندے ہتھ اقتدار دینا بہت خطرناک اے۔
تفصیل مطابق ریحام خان دی کتاب نے پاکستانی سیاست وچ اک تھرتھلی پا دتی اے۔ پاکستانی میڈیا دا دھیان وی ریحام خان دی جھیڑوی کتاب ول اے۔ اجے ریحام خان دی کتاب دے مبینہ اقتباسات بارے گل ختم نہیں ہوئی سی کہ ریحام خان نے عمران خان اُتے اک ہور خطرناک الزام لا دتا۔ ریحام خان نے بھارتی میڈیا نوں انٹرویو دیندے ہوئے آکھیا کہ عمران خان اسلامی ووٹ بنک نوں اقتدار وچ آن لئی استعمال کر رہیا اے۔
پاکستان ایٹمی ملک اے تے اجیہے بندے ہتھ اقتدار دینا بہت خطرناک اے۔ میں ایس وار تحریک انصاف نوں ووٹ نہیں دیواں گی۔ اپنی کتاب وچ درج جنسی الزاماں دے حوالے نال گل بات کردے ہوئے ریحام خان دا کہنا سی کہ میں ایہ گل کیتی کہ کیویں جنسی دباء نوں سیاسی مقصداں لئی استعمال کیتا جاندا اے۔ جنسی ہراسگی دے کئی کیساں دا سدھا تحریک انصاف نال تعلق اے۔
عمران خان سدھے جنسی ہراسگی وچ ملوث نیں۔ ریحام خان دا کہنا سی کہ پاکستان وچ ہمیشہ کمزور سیاستدان رہے نیں ایس لئی فوج نوں ساہمنے آنا پیندا اے۔یقین اے کہ سیاستدان مضبوط ہون تے بھارت بارے پالیسی وچ فوج اوہناں توں رہمنائی لئے۔ اوہناں دا ہور کہنا سی کہ جدوں دوجیاں توں وکھ ہون دا دعوا کرو تے اوہدے توں آساں ہوندیاں نیں۔ عمران خان دے نظریات ہن تیکر غیر واضح نیں، حالیہ یوٹرن توں وی ایہ واضح اے۔
