اسلام آباد( پاکستان پوائنٹ نیوز06۔جون2018ء ) پی ٹی آئی چیئرمین عمران خان دی دوجی سابقہ بیوی ریحام خان دی کتاب بارے ہور انکشافات ساہمنے آن دا سلسلا جاری اے۔ نجی ٹی وی چینل دے پروگرام وچ گل بات کردے ہوئے پاکستانی اداکار حمزہ علی عباسی نے آکھیا کہ ریحام خان نے اپنی کتاب وچ کئی وڈے ٹی وی اینکرز اُتے ایجنسیاں دے ایجنڈے اُتے کم کرن تے اوہناں توں پیسے لین دا الزام لایا اے۔
حمزہ علی عباسی نے آکھیاکہ اپنی کتاب وچ ریحام خان نے ایہ وی آکھیا کہ پاکستان دی خفیہ ایجنسی آئی ایس آئی دے اک کرنل رینک دے افسر نے اوہناں نوں سد کے لفافے دی آفر کیتی تے آکھیا کہ اسیں چاہنے آں تُسیں ساڈے لئی کم کرو۔ پر ریحام خان نے آکھیاکہ میں کرنل نوں منع کر دا تے آکھیا کہ مینوں کوئی خرید نہیں سکدا۔ چیتے رہوے کہ پی ٹی آئی چیئرمین عمران خان دی دوجی سابقہ بیوی دی کتاب اجکل سوشل تے الیکٹرانک میڈیادے پروگراماں وچ بحث دا موضوع بنی ہوئی اے۔
ایس توں پہلاں ریحام خان نے اپنی کتاب وچ عمران خان اُتے ویاہ توں پہلاں جنسی طور اُتے ہراساں کرن دا وی الزام لایا۔ ریحام خان نے اپنی کتاب وچ عمران خان نال اک ملاقات دا ذکر کردے ہوئے آکھیا اے کہ ایہ ویاہ توں پہلے میری عمران خان نال دوجی ملاقات سی۔ عمران خان نے مینوں پہلے اپنے گھر سدیا، کیونکہ ایہ ساڈی دوجی ملاقات سی ایس لئی میں بہت گھبرائی ہوئی سی کہ آخر مینوں عمران خان نے اپنے گھر کیوں سدیا اے۔
ایس لئی میں احتیاطن اپنی اک دوست نوں بنی گالا دے باہر رُکن لئی آکھیا۔ دوست نوں ہدایت کیتی کہ کوئی اُلٹی سدھی حرکت ہوئی تے میں تینوں کال کراں گی تے فیر اسیں ایتھوں چلے چلاں گے۔ ریحام خان دا کہنا سی کہ جدوں میں بنی گالا اپڑی تے عمران خان نے مینوں واک اُتے چلن لئی آکھیا۔ایس موقعے تے عمران خان نے میری ہیلز ویکھ کے آکھیا کہ تہاڈی ہیلز بہت اُچی اے، تُسیں کیویں ٹُرو گے؟فیر میں اپنی ہیلز بیگ وچ رکھی تے بیگ وچوں دوجی جُتی کڈھ کے پائی۔
ایس واک دوران عمران خان کدی اپنی سیاست دیاں گلاں کردا رہیا تے کدی اپنے بالاں دا ذکرتے کدی میریاں تعریفاں ۔ فیر اسیں کھانا کھادا تے کھانا کھان مگروں عمران خان نے مینوں جنسی طور اُتے ہراساں کرن دی کوشش کیتی۔ میں ڈر گئی تے سوچن لگ گئی کہ میں ایتھے کیوں آئی۔ ایس دوران میں عمران خان نوں دھکا دے کے دور کیتا۔ عمران خان نے مینوں آکھیا کہ میں جاننا واں توں ایس طرحاں دی کُڑی نہیں، ایس لئی میں تیرے نال ویاہ کرنا چاہنا واں۔ میں آکھیا کہ تُسیں پاگل ہو گئے او ، میں تہانوں جاندی تیکر نہیں تے تُسیں آکھ رہے او کہ ویاہ کر لوو۔
