لاہور( پاکستان پوائنٹ نیوز05۔جون2018ء ) لاہور توں قومی اسمبلی دے حلقہ این اے 125وچ برادری ازم دے اختلافات مگروں سابق وزیر اعظم نواز شریف دی دھی مریم نوازولوں حلقہ این اے 125توں الیکشن لڑن یاں نہ لڑن دے حوالے نال سوچیا جا رہیا اے پر مریم نواز شریف الیکشن کس حلقے توں لڑن گیاں ایہدا فیصلا اوہناں دے والد نواز شریف کرن گے۔ دسیا گیا اے کہ مریم نوازنے حلقہ این اے 125توں الیکشن لڑن دا فیصلا کیتا سی پر ذکر کیتے گئے حلقے وچ لمے چِر توں آرائیں برادری ولوں امیدوار ہون دی وجہ توں حلقے وچ برادری ازم کُھل کے ساہمنے آ گئی۔
ایس صورتحال وچ کشمیری تے آرائیں برادری اک دوجے دے مقابلے وچ کھلو گئی اے۔ آرائیں برادری دا کہنا سی کہ ایس حلقے توں ہمیشہ آرائیں برادری دا امیدوار کھلوندا اے تے کامیاب ہوندا اے، جیہدی مثال 1979توں حاجی شریف تے ماجد ظہور دی اے جو بطور آرائیں امیدوار الیکشن لڑدے آ رہے نیں تے اوہی ایس حلقے توں کامیاب وی ہوئے نیں۔ ایس صورتحال وچ آرائیں برادری نے ایس حلقے توں مریم نواز دی مخالفت کردے ہوئے اپنے امیدوار نوں سپورٹ کرن دا فیصلا کیتا اے۔
